ӨЗБЕКСТАН РЕСПУБЛИКАСЫ ДЕНЕ ТӘРБИЯСЫ ҲӘМ СПОРТ УНИВЕРСИТЕТИНИҢ НӨКИС ФИЛИАЛЫ

   Қарақалпақстан Республикасында дене тәрбиясы ҳәм спортты ғалабаластырыў, халық, әсиресе, жаслар арасында саламат турмыс тәризин үгит-нәсиятлаў ушын зәрүр шараятлар жаратыў, халықаралық спорт жарысларында қатнасатуғын жасларды таярлаў мақсетинде Министрлер Кабинети 2018-жылы 13-ноябрь күни 924-санлы қарары менен Өзбекстан Республикасы Дене тәрбиясы ҳәм спорт министрлиги, Жоқары ҳәм орта арнаўлы билимлендириў министрлиги, Экономика министрлиги, Қаржы министрлиги ҳәм Қарақалпақстан Республикасы Министрлер Кеңесиниң Өзбекстан мәмлекетлик дене тәрбиясы ҳәм спорт университетиниң Нөкис филиалын шөлкемлестириў ҳаққындағы усынысына келисим берилди.

Филиалдың тийкарғы ўазыйпалары:

   Спорт хызмети, дене тәрбиясы ҳәм спорт менежменти, мектепке шекемги ҳәм басланғыш билимлендириўде дене тәрбиясы ҳәм спорт, психология (спорт) тәлим бағдарлары бойынша жоқары қәнигели кадрларды халықаралық стандартлар дәрежесинде сапалы таярлаўды тәмийинлеў; хызметлер ҳәм саламатластырыў тармақларын раўажландырыўдың илимий-технологиялық ўазыйпаларын шешиўге, алдыңғы шет ел тәжирийбелеринен пайдаланған ҳалда спорт тараўына бағдарланған илимий-әмелий изертлеўлерди алып барыў ҳәм исленбелерди әмелге асырыў; оқыў ҳәм илимий жойбарларды әмелге асырыў, билимлендириў ҳәм илимий изленислер процессине қәнигелерди кеңнен тартыў мақсетинде ислеп шығарыў ҳәм қайта ислеў, тараўлардағы республикалық ҳәм шет ел жетекши жоқары оқыў орынлары ҳәм илимий орайлар менен бирге ислесиў байланысларын раўажландырыў; республика ҳәм шет ел жоқары оқыў орынлары ҳәм илимий орайларға қәбилетли жас питкериўшилерди магистратура ҳәм докторантураға турақлы жибериў арқалы филиалдың илимий-педагогикалық потенциалын арттырып барыў болып есапланады.

   Өзбекстан Республикасы оқыў орынларына оқыўға қабыл етиў бойынша мәмлекетлик комиссиясы мәжлисиниң 2018-жылы 6-декабрьдеги 14-санлы протоколы менен Өзбекстан мәмлекетлик дене тәрбиясы ҳәм спорт университетиниң Нөкис филиалында 2018-2019-оқыў жылы 10-январьдан баслап тийисли тәлим бағдарлары бойынша студентлерди қабыллаўға разылық берилди.