Belgili pedagog, ádiwli ustaz, kórnekli alım, pedagogika ilimleriniń kandidatı, professor, Greciyanıń «Áyyemgi dúnya» («Antik dúnya») xalıqaralıq akademiyasınıń akademigi Perdebay Shılmanov 80 jasta.

 Usı múnásibet penen búgin Ózbekstan mámleketlik dene tárbiyası hám sport universiteti Nókis filialında «Ádiwli ustaz – jaslar itibarında» atamasında ushırasıw bolıp ótti.

 Ushırasıwdı filial direktorı, professor B.Erimbetov kiris sóz benen ashtı hám basqarıp bardı. Ol óz sózinde ustazdın ómiri, ilim jolında qosqan miynetleri hám shákirtleriniń erisken tabısları haqqında keń túrde toqtalıp ótti.

 Bunnan soń sózge shıqqan ustazdıń kásiplesleri hám shákirtleride onıń ómir jolı hám dóretiwshilik miynetleri haqqında filial professor-oqıtıwshıları hám student-jaslarına maǵlıwmatlar berip ótti.

 Ádiwli ustaz, kórnekli alım, pedagogika ilimleriniń kandidatı, professor, Greciyanıń «Áyyemgi dúnya» («Antik dúnya») xalıqaralıq akademiyasınıń akademigi Perdebay Shılmanov 1943-jılı 15-sentyabr kúni Qaraózek rayonınıń «Qarabuǵa» awılında dúnyaǵa kelgen. 1960-jılı Qaraqalpaq mámleketlik pedagogikalıq institutınıń dene tárbiyası fakultetine oqıwǵa kirdi. Studentlik dáwirinde gimnastika menen tereń shuǵıllanıp, bir qansha jarıslarda jeńimpaz hám sıylı orınlardı qolǵa kirgizdi. Sonday-aq, studentlik dáwirinde sport, dene tárbiyası boyınsha maqalalar tayarlap jergilikli gazetalarda járiyalap baradı. Qaraqalpaqstan radiosındı «Sport áleminde» esittiriwin tayarlaw hám alıp barıwda jurnalistlerge járdemshi bolıp júredi. Instituttı tabıslı pitkergennen soń sol jerde assistent-oqıtıwshı bolıp jumıs islep qaldı. 1974-jılı Moskva qalasındaǵı Pútkil awqamlıq dene tárbiyası hám sporttı izertlew institutınıń aspirantı bolıp, 1978-jılı «Qaraqalpaq milliy háreketlik oyınlarınıń awıllıq mekteplerde qollanıw usılları» temasında kandidatlıq dissertaciyasın tabıslı jaqlap shıǵadı hám Qaraqalpaqstanda sport tarawındaǵı dáslepki pedagogika ilimleriniń kandidatı boladı. Perdebay Shılmanovtıń kóp jıllıq ilimiy-pedagogikalıq miynetleri esapqa alınıp oǵan 2001-jılı Ájiniyaz atındaǵı Nókis mámleketlik pedagogikalıq institutınıń professorı ataǵı berildi.

 1993-jılı Qaraqalpaqstan Respublikası, 2004-jılı Ózbekstan Respublikası «Xalıq bilimlendiriw aǵlası» nıshanı menen sıylıqlandı. «Ózbekstan Ǵárezsizliginiń 10 jıllıǵı» kókirek belgisin aldı. «Úlgili ustaz–2003» nominaciyası jeńimpazı. 2006-jılı bolsa Greciyanıń «Áyyemgi dúnya» xalıqaralıq Akademiyasınıń doktorı, professorı atandı. «Ózbekstan sport nuranıyı» (2012-2019) hám 2021-jılı «Ózbekstan Respublikası dene tárbiya hám sport aǵlası» kókirek nıshanı menen sıylıqlanǵan.

Pedagogika ilimine salmaqlı úles qosıp kiyatırǵan pedagogika ilimleriniń kandidatı, professor Perdebay Shılmanovtıń ómiri, dóretiwshilik jolı, ilimiy miynetleri hám sportqa qosqan úlesi búgingi jaslardı tereń bilimli, ilimli, fizikalıq jaqtan kúshli, shaqqan etip tárbiyalawda áhmiyeti úlken.

Filial Baspasóz xızmeti.