Ózbekstan mámleketlik dene tárbiyası hám sport universiteti Nókis filialı student-jasların qutqarıwshılar kásibine qızıqtırıw maqsetinde «Sport túrleri» fakulteti jaslar menen islesiw, ruwxıylıq hám aǵartıwshılıq isleri boyınsha dekan orınbasarı hám tyutorları basshılıǵında Nókis qalası ayrıqsha jaǵdaylar bólimi 2-órt qutqarıw bólimshesine «Ashıq esikler kúni» shólkemlestirildi.

Ol jerde bólimshe baslıǵınıń orınbasarı, mayor Q.Ámetov tárepinen studentlerge eń dáslep ayrıqsha jaǵdaylar, yaǵnıy, órtler júz bergende waqıtları qalay háreketleniwi kerekligi, jasap atırǵan turaq jaylarında iyis gazin sezgen jaǵdayda birinshi bolıp nelerge itibar beriw boyınsha, eger, órt kelip shıqqanda jaǵdayda dárhál órt óshiriw xızmetiniń qısqa nomerlerine xabar beriw kerekligi haqqında tolıq maǵlıwmatlar berip ótti.

Studentlerdi bólimsheniń imkaniyatları, ishki tártip qaǵıydaları hám órt óshiriwshilerdiń kúnlik jumıs rejimi menen jaqınnan tanıstırıw menen birge jılıtıw úskenelerinen paydalanǵanda itibarlı bolıwǵa shaqırdı.

Student-jaslar taraw qánigelerinen ózlerin qızıqtırǵan sorawlarına juwaplar aldı.

A.Ganieva.