Búgin 2-oktyabr kúni Ózbekstan mámleketlik dene tárbiyası hám sport universiteti Nókis filialında gimnastika, taekvando hám velosport sport túrlerin elede rawajlandırıw maqsetinde «Jeke gúres hám tábiyiy pánler» hám «Dene tárbiyası teoriyası hám gumaniytar pánler» kafedrası baslıqları Nókis olimpiya hám paralimpiya sport túrlerine tayarlaw orayı hám Respublikalıq gimnastika sport túrlerine qánigelestirilgen sport mektebi direktorları menen óz-ara birge islesiw shártnamaların dúzdi.

 Eki tárepleme dúzilgen shártnamada joqarıda kórsetilgen sport túrleri boyınsha texnikalıq bazalar bekkemlew, ilim-bilimlendiriw hám ámeliyattı integraciya qılıw, xalıq-aralıq birge islesiw baylanısların rawajlandırıw, milliy saylandı komanda aǵzaları menen islesiw, bolıp ótetuǵın jarıslar aldındaǵı oqıw shınıǵıwların birgelikte ilimiy tiykarda shólkemlestiriw hám trenerler tájriybesin jetilistiriw. Sonday-aq, studentlerdi qánigeligi boyınsha joqarı maman kadrlar etip tayarlaw, ayrıqsha qábiletke iye studentler menen professor-oqıtıwshılardıń áhmiyetli mashqalalardıń sheshimine baǵdarlanǵan temalar tiykarında ilimiy izertlew jumısların ótkeriw. Studentlerdi jarıs qaǵıydaları hám tóreshilik ámeliyatındaǵı bilim kónlikpelerin qáliplestiriw sıyaqlı bir qatar kelisimler orın aldı.

 Bul shártnama keleshekta gimnastika, taekvando hám velosport sport túrleri boyınsha kadrlardıń tájriybesin asırıw menen birge usı baǵdarda filialımızda jetik qánigelerdiń jetilisip shıǵıwlarına tiykar bolatuǵın dáslepki qádem bolıp esaplanadı.

Filial Baspasóz xızmeti.