Filialdıń ziyrek studentlerin dene tárbiyası hám sport tarawınıń zamanagóy baǵdarları menen tanıstırıw, ilimiy pedagogikalıq iskerlikke tartıw, olardı tańlap alıw, magistratura hám doktoranturaǵa baǵdarlaw maqsetinde professor-oqıtıwshılar hám 1-kurs studentleri qatnasında hár bir kafedra kesiminde seminar-trening bolıp ótti.

 Seminar Ózbekstan mámleketlik dene tárbiyası hám sport universiteti Nókis filialı direktorı, professor B.Erimbetov kiris sóz benen ashıp berdi hám studentlerdi dene tárbiyası hám sport tarawınıń zamanagóy baǵdarları boyınsha ilimiy izertlew iskerligine qamtıp alıw arqalı filialdıń ilimiy potencialın joqarılatıw boyınsha óziniń usınısların berdi. Sonday-aq, seminar-trening qatnasıwshılarına ilimiy maqalanı jazıw tártibi, ilimiy jumıs penen shuǵıllanıwdı qálewshi studentlerdi qollap-quwatlawǵa hámiyshe tayar ekenligin atap ótti.

 «Sport oyınları», “Jeke gúres hám tábiyiy pánler”, «Dene tárbiyası teoriyası hám gumanitar pánler» kafedrası baslıqları seminar-trening qatnasıwshılarına dene tárbiyası hám sport tarawınıń zamanagóy baǵdarları boyınsha maǵlıwmat berdi hám “Ustaz-shákirt” baǵdarlaması tiykarında professor-oqıtıwshılarǵa biriktirilgen ziyrek studentlerdiń jetiskenliklerin hám olardıń abzallıqların aytıp ótti.

 Seminar Qaraqalpaq mámleketlik universiteti “Dene mádeniyatı teoriyası hám metodikası” kafedrası w.a docenti, p.i.b.f.d  (PhD) J.J.Utegenov, w.a docenti, p.i.b.f.d  (PhD) J.Turdımuratov hám w.a docenti, p.i.b.f.d  (PhD) B.Qoylıbaevlar shet tili boynsha sertifikatlar alıw, ilimiy tezis hám maqalalardıń  jazılıw tártibi, olardıń parıqları, ataqlı, mámleketlik stipendiyalar hám bul stipendiya iyelerine beriletuǵın imkaniyatlar haqqında, sonday-aq, ziyrek studentlerdi ilimiy pedagogikalıq iskerlikke tartıw, olardı tańlap alıw, magistratura hám doktoranturaǵa baǵdarlaw hám qamtıp alıw ilajların ámelge asırıw boyınsha másláhatlerin berıp ótti.

 Onnan soń studentler ózleriniń qızıqtırǵan sorawlarına taraw qánigelerinen tiyisli juwapların aldı.

Filial Baspasóz xızmeti.