Búgin Ózbekstan mámleketlik dene tárbiyası hám sport universiteti Nókis filialında student-jaslar menen tıǵız islesiwdi jolǵa qoyıw, olardıń oqıw barısında dus kelip atırǵan tosıqların anıqlaw, pikir-usınısların tıńlaw, ushırasıp atırǵan mashqalaların sol jerdiń ózinde saplastırıw maqsetinde «Direktor hám jaslar» ushırasıwı bolıp ótti.

Onda filial direktorı, professor B.Erimbetov filial student-jasları menen ushırastı hám olarǵa dáslep Húrmetli Prezidentimiz basshılıǵında usı jıldıń 13-fevral kúni «Olimpiya hám paralimpiya háreketin jáne de rawajlandırıw, ǵalabalıq sporttı jańa basqıshqa alıp shıǵıw hám xalıqtıń fizikalıq belsendiligin arttırıw ilajları boyınsha» hám 14-fevral kúni Kóksaray rezidenciyasında mámleketimiz jasları menen sóylesiwinde belgilep berilgen wazipalar, jaratılıp atırǵan sharayatlar,  berilip atırǵan jeńillikler haqqında keń túrde maǵlıwmatlar berdi.

El basshımızdıń tikkeley baslaması hám qollap-quwatlawı menen mámleketimizde jaslar ushın jaratılıp atırǵan bunday imkaniyatlardan hár bir studentti únemli paydalanıwǵa shaqırdı.

Sonday-aq, filial studentleri arasında da elimizdegi usınday imkaniyatlardan durıs paydalanıp sport jarıslarında hám oqıwda jaqsı nátiyjelerge erisip atırǵan studentler barlıǵın maqtanısh penen atap ótti hám olardıń arasınan eń belsendilerine filial tárepinen tayarlanǵan Húrmet jarlıqların tapsırdı.

Ushırasıw barısında filial direktorı studentlerdiń pikir-usınısların tıńladı hám olar menen tuwrıdan tuwrı islesiwge hámiyshe tayar ekenligin bildirdi.

Filial Baspasóz xızmeti.