Studentlerdiń ata-anaları menen jaqınnan tanısıw arqalı olar menen elede tıǵız baylanısta birge islesiwdi jolǵa qoyıw. Olardı joqarı bilimlendiriw tarawındaǵı ózgerisler hám filialdıń ishki imkaniyatları menen jaqınnan tanıstırıw maqsetinde filial direktorı studentlerdiń ata-anaları menen ushırastı.

Ushırasıwdı filial direktorı, professor Bayrambay Erimbetov kiris sóz benen ashtı hám basqarıp bardı. Ol óz sózinde dáslep usı jıldıń 13-fevral kúni Prezident basshılıǵında olimpiya hám paralimpiya háreketin jáne de rawajlandırıw, ǵalabalıq sporttı jańa basqıshqa alıp shıǵıw hám xalıqtıń fizikalıq belsendiligin arttırıw ilajları boyınsha ótkerilgen videoselektor májilisinde hám 14-fevral kúni Kóksaray rezidenciyasında mámleketimiz jasları menen bolıp ótken ushırasıwında sport tarawına, jaslarǵa qaratıp atırǵan itibar hám jaratılǵan sharayatlar haqqında maǵlıwmatlar berip ótti.

Onda oqıw ornında studentlerdiń tıyanaqlı bilim alıwları ushın jaratılǵan sharayatlar, olardıń tártibi, XEMIS platforması, sabaqlarǵa úlgeriwi, erisilip atırǵan jetiskenlikler, kontrakt tólemleri, ilimiy potencialı, sırt ellerdiń joqarı oqıw orınları menen xalıqaralıq birge islesiw boyınsha dúzilgen kelisimler, filialdıń iskerligin keńeytiw baǵdarında islenip atırǵan jumıslar haqqında keń túrde maǵlıwmatlar berildi.

Oqıwda, sportta, jámiyetlik jumıslarda jaqsı nátiyje kórsetip kiyatırǵan studentlerdiń ata-analarına filial administraciyası tárepinen tayarlanǵan Minnetdarshılıq xatı tapsırıldı.

Ushırasıw barısında ata-analar joqarı bilimlendiriw sistemasındaǵı ózgerisler hám oqıw procesi menen baylanıslı bolǵan ózlerin qızıqtırǵan sorawlarına juwaplar aldı.

Filial Baspasóz xızmeti.