Joqarı bilimlendiriw tarawındaǵı ózgerisler haqqında studentlerdiń ata-analarına keń túrde maǵlıwmat beriw. Olar menen jaqınnan tanısıw hám sol arqalı tıǵız baylanısta birge islesiwdi jolǵa qoyıw. Ata-analardı filialdıń ishki imkaniyatları menen jaqınnan tanıstırıw maqsetinde Ózbekstan mámleketlik dene tárbiyası hám sport universiteti Nókis filialında studentlerdiń ata-analar menen ushırasıwı shólkemlestirildi.

Ushırasıwdı filial direktorınıń Jaslar máseleleri hám ruwxıylıq-aǵartıwshılıq isleri boyınsha birinshi orınbasarı G.Xojametov kiris sóz benen ashtı hám basqarıp bardı. Ol óz sózinde studentlerdiń sabaqlardı tolıq ózlestiriwleri ushın oqıw ornında jaratılǵan imkaniyatlar, filialdıń usı kúnge shekem erisken jetiskenlikleri hám aldaǵı rejeleri haqkında maǵlıwmat berip ótti.

 – Búgin ótkerilip atırǵan ata-analar májilisinde bizler ózlerimiz ushın júdá kóp kerekli maǵlıwmatlardı aldıq. Sońǵı jılları joqarı oqıw orınları sistemasına engizilgen kredit moduli haqqında tolıq túsinikke iye boldıq. Filial basshıları perzentlerimizdiń kelesheginiń aydın bolıwın táminlew ushın biz ata-analardı birge tıǵız baylanısta islesiwge shaqırımaqta. Negizinde, biz ata-analar perzentlerimizdiń keleshegi ushın qayǵırıwımız kerek. Gúz-qıs máwsiminde iyis gázinen záhárleniwdiń aldın alıwda ata-analardı sergek bolıwǵa shaqırmaqta, filial administraciyası  perzentlerimizdiń tálim-tárbiyasında teńdey juwapker ekenliginen júdá quwanıshlımız deydi, – ata-analardıń biri biz benen sáwbeti barısında.

Shólkemlestirilgen jıynalıs barısında ata-analar oqıw barısı menen baylanıslı bolǵan sorawlarına juwaplar aldı.

Filial Baspasóz xızmeti.