Húkimet qararı menen (443-sanlı, 18.08.2026 j.) “Turistlik startaplardı – jańa túrdegi turizm xızmetlerin islep shıǵıp, ámeliyatqa engiziwge baylanıslı qárejetlerdiń bir bólegine subsidiya ajıratıw boyınsha mámleketlik xızmetti kórsetiw”diń hákimshilik reglamenti tastıyıqlandı.

Reglamentke bola, qárejetlerdi qaplaw mámleketlik xızmetler orayları yamasa BIMXP (my.gov.uz) arqalı Turizm komiteti (Komitet) tárepinen ámelge asırıladı.

Onda startaptı islep shıǵıp, ámeliyatqa engiziwge baylanıslı qárejetlerdiń 50 procenti, biraq 1 mlrd sumnan kóp bolmaǵan muǵdarda hár jılı eń jaqsı 10 startapqa shekem subsidiya ajıratıladı. 

Komitet baslıǵı tárepinen Turizm startap joybarların kórip shıǵıw boyınsha komissiya quramı qáliplestiriledi.

Komissiya tárepinen talabanǵa onıń arzası kelip túsken kúnnen baslap 5 jumıs kúninde sáwbetlesiw ótkeriletuǵını haqqında xabarnama jiberiledi.

Komissiya sáwbetlesiw ótkerilgennen soń 10 jumıs kúni ishinde talabannıń usı Reglamentte belgilengen talaplarǵa muwapıqlıǵın úyrenip shıǵadı.

Komissiya tárepinen startaptı bahalawda onıń belgili bir turistlik xızmetti rawajlandırıwǵa qaratılǵanı, búgingi kúnde turistler ushın áhmietliligi hám aldın bolmaǵan yamasa sezilerli dárejede jetilistirilgen sheshimdi usınıw dárejesine itibar qaratıladı.

Qárejetlerdi qaplaw haqqında qarar qabıl etilgen kúnnen baslap 7 jumıs kúni ishinde Komitet talapkerdiń xızmet kórsetiwshi kommerciyalıq banklerdegi esap betlerine qarjılardı ótkerip beredi.

Filial Baspasóz xızmeti.