Jaslardıń sabaqtan bos waqıtlarında hár túrli ádebiy kitaplar oqıwın támiyinlew, olardı kitap oqıwǵa qızıqtırıw, filialdıń professor-oqıtıwshılarınıń waqıtların tejew, yaǵnıy, qaraqalpaq, ózbek, jáhán ádebiyatların izlep kóp waqıtların bosqa sarıplamawları ushın Ózbekstan mámleketlik dene tárbiyası hám sport universiteti Nókis filialında kitaplar «Sawda yarmarkası» shólkemlestirildi.
– Jumıs waqtımızdıń tıǵızlıǵına baylanıslı qalamızda jaylasqan kitap satatuǵın sawda orınlarına barıp, ózim qızıqqan ádebiy kitaplardı izlewge tuwrısı tán alıp aytaman, derlik, waqıt ajırata almaytuǵın edim. Búgin azan menen filialımızdıń faesinde satıwǵa qoyılǵan kitaplardı kórip, qattıǵa quwanıp kettim hám ózim jaqsı kórip oqıytuǵın qaraqalpaq, ózbek, jáhán ádebiyatında salmaqlı ornı hám úlesi bar jazıwshı, shayırlardıń bir, neshe kitapların aldım. Bunıń ushın kitaplap «Sawda yarmarkası»na ózleriniń kitapları menen kelgen «UMU» juwapkershligi sheklengen jámiyeti aǵzalarına, bizlerdiń jumıs waqtımızdıń tıǵızlıǵın inabatqa alıp, usınday bir jaqsı yarmarkanı shólkemlestirip bergen filialımız basshılarına sheksiz minnetdarshılıǵımızdı bildiremiz. Bunday ziya jolına baslaytuǵın kitaplar «Sawda yarmarka»larınıń tez-tezden shólkemlestirilip barıwların qáleymiz,-deydi filialımızdıń Jaslar menen islesiw, ruwxıylıq hám aǵartıwshılıq bólimi baslıǵı B.Sabirov biz benen sáwbeti barısında.
Haqıyqatında kitap sizdi ómirde eń tuwrı jolǵa baslaytuǵın jolshı juldız. Eger, siz kitap penen doslasıp, onıń menen tillesip, onnan ruwxıy azıq alıp barsańız, ol sizge bir ómirge tatıytuǵın azıq bereri anıq. Sonıń ushın biz sizlerdi kitap oqıwǵa, kitap penen jaqın dos bolıwǵa shaqıramız. Sebebi, kitap biziń ruwxıy dúnyamızdı bayıtadı, ilimde jańalıq ashıwǵa tiykar jaratadı.

Filial Baspasóz xızmeti.