Ámir Temur xalıqarılıq fondı Ózbekstanda hám xalıqaralıq masshtabta keń kólemde belsendilik kórsetip, iygilikli baslamalardı ámelge asırıp kelmekte. Usı iygilikli islerdiń biri sıpatında jaqında «Xalıqaralıq Ámir Temur qayırqomlıq jámiyetlik fondı»nıń atqarıwshı direktorı Sohibaxon Azamovanıń baslaması menen «Berdaq Ǵarǵabay ulı» atındaǵı xalıqaralıq estelik belgisi shólkemlestirildi.

– Bul xalıqaralıq estelik belgisin shólkemlestiriwden maqset – Prezidentimiz tárepinen baslama sıpatında kórsetilgen «Úshinshi renessans», «Bul diyar hámmemizdiki!» ideyaları tiykarında qaraqalpaq xalqına degen úlken húrmetti kórsetiw, qaraqalpaq xalqın, mádeniyatın hám ádebiyatın Ózbekstan hám xalıqaralıq maydanda ele de tanıtıw hám dańq-abırayın arttırıw bolıp esaplanadı, – deydi fondtıń atqarıwshı direktorı Sohibaxon Azamova. – Sonıń menen birge, biziń fondımız keleshekte mádeniyat, kórkem ádebiyat, ádebiyattanıw hám basqa da jónelisler boyınsha tańlawlar shólkemlestiriw niyetinde. Sonday-aq, qaraqalpaq xalqı tuwralı, sonıń ishinde úrp-ádet, salt-dástúrleri, mádeniyatı hám ádebiyatı, tariyxın óz ishine alǵan kóp tomlı kitaplardı baspadan shıǵarıw islerin ámelge asırıwdı jobalastırǵanbız.«Berdaq Ǵarǵabay ulı» xalıqaralıq estelik belgisi menen Ózbekstan hám Qaraqalpaqstanda, sonday-aq, sırt ellerde Berdaqtıń ómiri hám dóretiwshiligine ayrıqsha itibar qaratıw, elimizde turaqlılıqtı támiyinlew, onıń ekonomikalıq, siyasıy-jámiyetlik, ilimiy, ruwxıy-aǵartıwshılıq, ádebiyat, kórkem óner tarawların hám qorǵanıw qúdiretin kúsheytiw, demokratiyalıq reformalardı ámelge asırıw, milletleraralıq tatıwlıq, salamat hám nawqıran áwladtı tárbiyalaw islerine múnásip úles qosıp kiyatırǵan barlıq taraw wákilleri, Ózbekstan hám sırt el puqaraları sıylıqlanadı.Sıylıqlanǵanlarǵa estelik belgisi menen qosa onıń gúwalıǵı beriledi. «Berdaq Ǵarǵabay ulı» xalıqaralıq estelik belgisi kókirektiń shep tárepine mámleketlik sıylıqlardan keyin taǵıladı.Álbette, jámiyetimizdiń qaysı tarawında bolmasın múnásip miynet etip kiyatırǵan insanlardıń miynetin qádirlew – eń dáslep, olarǵa qaratılǵan az ǵana bolsa da itibardan baslanadı. Jańadan shólkemlestirilip atırǵan «Berdaq Ǵarǵabay ulı» atındaǵı xalıqaralıq estelik belgisi bolsa miynette jeń túrinip, xalıqqa ayanbay xızmet etip atırǵan hár bir qaraqalpaqstanlıǵa ayrıqsha ruwx hám kúsh-quwat baǵıshlawı sózsiz.

Qaraqalpaqstan xabar agentligi.