Ózbekstan Respublikası Turizm hám sport ministrligi tárepinen usı jıldıń 8-14-dekabr kúnleri Tashkent qalasında sporttıń boks túrinen 18 jastan úlken er hám qız balalar arasında Ózbekstan chempionatı bolıp ótti.

Chempionatqa Tashkent qalası, Qaraqalpaqstan Respublikası hám barlıq wálayatlardan qatnasqan sportshılar qatarında Ózbekstan mámleketlik dene tárbiyası hám sport universiteti Nókis filialınan Sport túrleri fakulteti boks baǵdarınıń 1-kurs studenti Anjelino Nzamatdinova qatnasıp sıylı 3-orındı iyelep keldi.

– Eń dáslep, televizorda elimiz sportshılarınıń Jáhán sport arenalarında erisken tabısların kórip, mende sportqa degen qızıǵıwshlıq payda boldı. Boks penen shuǵıllanbas aldın, sporttıń taekvando WTF túri menen shuǵıllanǵanman. Sporttıń taekvando WTF túrinen on bir márte Qaraqalpaqstan chempionı bolǵanman. Bir neshe márte turnerlerde qatnasıp sıylı orınlardı iyelegenmen. 2018-jılı Qazaqstan Respublikasınıń Atraw qalasında bolıp ótken Aziya chempionatına qatnasıp 2-orın jeńimpazı bolǵanman. Házirgi kúnde bir jılǵa shamalastı sporttıń boks túri menen shuǵıllanıp kelmektemen,-deydi Anjelino biz benen sáwbeti barısında.

Álbette, Anjelino filialımızda bilim alıw menen birge sporttıń boks túrinende jaqsı nátiyjelerge erisip kelmekte.

– Bul qızımız basqa teńleslerine qaraǵanda ózindegi tırısqaqlıǵı menen ajıralıp turadı. Dáslep, sporttıń taekvando WTF túri menen shuǵıllanıp jaqsı nátiyjelerge erisken bolsa, házirgi kúnde sporttıń boks túri menen shuǵıllanıp kelmekte hám jaqsı nátiyjelerge erisip kelmekte. Usı jılı birinshi márte sporttıń boks túrinen qız balalar arasında ótkerilgen Qaraqalpaqstan chempionatında 1-orındı aldı. Bul qızımızdıń sport tarawında jaqsı nátiyjelerge erisiwinde dáslepki shınıǵıwların jaqsı alıp barǵan trenerleri M.Jumabaev hám R.Ibadullaevlardıń  miynetleri úlken ekenligin ayrıqsha atap ótiw orınlı. Sportshı jaslarımız filialımızǵa oqıwǵa kirgennen soń olarda teoriya menen ámeliyattı birge alıp barıw múmkinshligi payda boladı. Eger, ámeliyat penen teoriyanı sportshı jaslarımız tolıq meńgere alsa, onnan jaqsı sport sheberi jetilisip shıǵadı,- deydi Anjelino filialdaǵı ustazı Pamir Adilchaev biz benen sáwbeti barısında.

Ustazınıń aytqanı haqıyqatlıqqa tuwra keledi. Sebebi, bunı Anjelino mısalında kóriwimizge boladı. Anjelinonıń boks penen shuǵıllanıp baslaǵanına onsha kóp waqıt bolmaǵan bolsada erisip atırǵan nátiyjeleri maqtawǵa ılayıq. Bul boksshı qızımızdan keleshekte jaqsı sportshı jetilisip shıǵıwına biz isenemiz.

Filial Baspasóz xızmeti.