Ózbekstan mámleketlik dene tárbiyası hám sport universiteti Nókis filialınıń «Dene tárbiyası hám sport xabarshısı» ilimiy-metodikalıq jurnalınıń birinshi sanında qaraqalpaq, ózbek, rus hám inglis tillerinde  tayarlanǵan maqalalar orın aldı.

Bul ilimiy-metodikalıq baslımnıń tiykarǵı maqseti filialda ilimiy-metodikalıq jumıslardı jarıqqa shıǵarıw, joqarı oqıw orınları menen tájriybe almasıw, professor-oqıtıwshılar,  izleniwshilerdiń,  magistrantlardıń,  studentlerdiń ilimiy maqalaların baspa júzinde jarıtıwdan ibarat.

Jurnal Ózbekstan Respublikası Prezidenti Administraciyası janındaǵı Málimleme hám ǵalaba kommunikaciyalar agentligi tárepinen mámleketlik dizimnen ótkerilgen. Baslım jılına úsh márte baspadan shıǵadı.

Jurnalǵa bir qansha ilim kandidatları, ilim doktorları, professorlar redkollegiya aǵzaları etip biriktirilgen.

 Jurnaldıń birinshi sanında filialdıń professor-oqıtıwshılarınıń «Joqarı bilimlendiriw hám tálim-tárbiya», «Dene tárbiyası hám sport tarawın rawajlandırıwdıń ilimiy-metodologiyalıq tiykarları» hám «Jámiyetlik-gumanitar hám tábiyiy ilimler» baǵdarındaǵı ilimiy maqalalar orın alǵan.

Redakciya jámááti ilim jolındaǵı bárshe ilim pidáyileri menen birge islesiwge tayar. Olardan sport, jámiyetlik pánler baǵdarındaǵı ilimiy maqalaların kútip qaladı.

Filial Baspasóz xızmeti.