Prezident Shavkat Mirziyoev 7-mart kúni Tashkent qalasında rejelestirilgen qurılıs hám kóklemzarlastırıw jumıslarınıń prezentaciya menen tanıstı.

Bizge belgili, 2025-jılı Tashkent qalasında Jaslar arasındaǵı Aziya oyınları ótkeriledi. Oǵan kontinentimizden kóplegen sportshı hám trenerler, ıqlasbentler, jurnalistler keledi. Bul abıraylı jarıstı joqarı dárejede ótkeriw maqsetinde paytaxtımızdıń Yashnabad rayonında Olimpiya qalashısınıń qurılısı rejelestirilgen. Onıń joybarı Angliyanıń «Arup» injenerlik kompaniyası tárepinen islep shıǵılǵan.

Joybarǵa bola, qalashanıń orayında olimpiya stadionı, onıń eki qaptalında jabıq sport kompleksleri, suw sportı sarayı, shınıǵıw maydanshaları, eskek esiw basseyni qurıladı. Barlıq sharayatlar Aziya Olimpiya keńesi hám xalıqaralıq sport federaciyalarınıń talaplarına muwapıq boladı. Hákimshilik imarat, jataqxana, muzey hám xojalıq obektleri de qurıladı.

Jarıslardan tısqarı waqıtta qalasha oqıw-shınıǵıw bazası bolıp xızmet etedi. Bul jerde Joqarı sport sheberligi institutı, sport federaciyaları hám tarawdaǵı basqa da mákemeler jumıs alıp baradı.

Jáne bir áhmiyetli tárepi: qalasha jaylasatuǵın Jańa Ózbekstan kóshesi boylap terekler egilip, seyil etiw orınları shólkemlestiriledi. Ol jer xalıq ushın ashıq bolıp, seyil etiw, sport penen shuǵıllanıw múmkin boladı.

Mámleketimiz basshısı joybardıń bahası, sportshı hám tamashagóyler ushın jaratılatuǵın qolaylıqlardı hár tárepleme soradı. Juwapkerlerge jumıslardıń kólemi hám zárúr qarjı muǵdarın jılma-jıl esap-sanaq etip, anıq reje qáliplestiriw, qurılıs boyınsha tender járiyalaw boyınsha kórsetpeler berdi.

«Jasıl mákan» ulıwmamilliy joybarın ámelge asırıw boyınsha májiliste Prezidentimiz jol shetlerinde gúlleytuǵın hám japıraǵı reńli terekler egiw maqsetke muwapıq ekenin aytqan edi. Prezentaciyada bul baǵdardaǵı rejeler kórip shıǵıldı.

Bunıń ushın Tashkent qalasınıń Kishi aylanba jolı, Ǵárezsizlik, Nawayı, Islam Kárimov, Afrosiyob, Shahrisabz, Aybek, Babur sıyaqlı 21 kóshe tańlap alınǵan. Olarda kashtan, siren, yasen, lala teregi, shınar, lipa sıyaqlı sayamanlı náller egiw rejelestirilgen. Sonday-aq, tereklerdiń aǵashı durıs hám tamırı bekkem bolıwı ushın repikaj usılında jetistiriw mólsherlengen.

Mámleketimiz basshısı sayamanlı náller menen birge máhállelerde ánjir, ánar, qurma sıyaqlı miyweli terekler egiw, shertekli kósheler qurıw áhmiyetli ekenin atap ótti

ÓzA