Aldın xabar bergenimizdey filialdıń basketbol boyınsha saylandı komandası aǵzaları joqarı oqıw orınlarınıń student – jasları arasında ótkerilip atırǵan «Universiada – 2022″ sport oyınlarınıń Qaraqalpaqstan Respublikalıq basqıshında barlıq qarsılas komanda aǵzalarınan ústin kelip oyınnıń Nawayı wálayatında bolıp ótetuǵın keyingi aymaqlıq basqıshına jollama alǵan edi.

Usı jıldıń  2-7-oktyabr kúnleri Nawayı wálayatında bolıp ótken aymaqlıq basqıshında filialdıń er balalarınan dúzilgen saylandı komandası dáslep Nawayı wálayatınıń saylandı komandası aǵzaları menen kúsh sınastı hám qarsılas komanda aǵzalarınan 80:30 esabı menen ústin keldi. Soń ekinshi oyında filial komanda aǵzaları Buxara wálayatınıń saylandı komandası aǵzaları menen maydanda kúsh sınastı hám qarsılas komanda aǵzaların 59:45 esabı menen jeńip shıqtı. Oyınǵa túsken hár bir wálayattıń saylandı komanda aǵzalarınan ústin kelgen filial saylandı komandası aǵzaları úshinshi oyında Xorezim wálayatınıń saylandı komandasın qabıl etti hám qızǵın bellesiwlerge bay tárizde bolıp ótken jarısta 56:36 esabı menen qarsılas komanda aǵzaları ústinen jeńiske eristi.

– Hár bir saylandı komanda aǵzaları «Universiada – 2022″ sport oyınlarınıń aymaqlıq basqıshına jaqsı tayarlıq penen kelgenligi oyın barısında sezilip turdı. Lekin, bári-bir kúshli komanda aǵzaları kúshliligin etedi. Bunıń ayqın mısalı oyında erisilgen nátiyjelerdende kóriwińizge boladı. Komanda aǵzalarınıń alıp barǵan jaqsı tayarlıǵınıń ńátiyjesinde komandamızǵa qarsı oyınǵa túsken qarsılas komanda aǵzalarınıń ústinen jeńiske erisiwge tiykar jaratpaqta deydi, – sportshılardı jarısqa tayarlaǵan professor – oqıtıwshılardan biri A.Avezbaev.

Haqıyqatında da filial saylandı komandası aǵzaları Nawayı wálayatında bolıp ótken «Universiada – 2022″ sport oyınlarınıń aymaqlıq basqıshında barlıq qarsılas komandaları ústinen jeńiske erisip, oyınnıń Jizzaq wálayatında ótkeriliwi rejelestirilip atırǵan final basqıshına jollama aldı hám diplom menen sıylıqlandı.

Sonday-aq, komandamız aǵzası H.Mırzabaev shólkemlestiriwshiler tárepinen «Eń jaqsı oyınshı» nominaciyası menen sıylıqlandı.

Komanda aǵzaların jarısqa professor – oqıtıwshılardan A.Avezbaev hám S.Amaniyazovlar tayarladı.

Filial Baspasóz xızmeti.