Ózbekstan Respublikası Prezidentiniń 2021-jıl 29-iyul kúngi «Birlesken Milletler Shólkemi Bas Assambleyasınıń 2021-jıl 18-may sánesindegi Aralboyı aymaǵın ekologiyalıq innovaciyalar hám texnologiyalar aymaǵı dep járiyalaw haqqında»ǵı PQ-5202-sanlı qararına tiykarlanıp Qaraqalpaqstan Respublikasındaǵı joqarı bilimlendiriw hám ilim izertlew mákemelerindegi ilimiy jumıs penen shuǵıllanıp atırǵan alımlardıń maǵlıwmatlar bazasın qáliplestiriw, jas alımlardıń ilimiy potencialın artırıw, ilimi izertlew jumısların qollap-quwatlaw, ámeliy hám innovacion joybarların ámelge asırıwǵa kómeklesiw maqsetinde «Jas alımlar akademiyası» juwapkershiligi sheklengen jámiyeti shólkemlestirilgen edi.

Búgin 7-oktyabr kúni Ózbekstan mámleketlik dene tárbiyası hám sport universiteti Nókis filialı professor – oqıtıwshıları, jas alımlar, ilim jolına endi qádem qoyıp atırǵan student-jaslardı «Jas alımlar akademiyası» juwapkershiligi sheklengen jámiyetiniń aldına qoyǵan rejeleri menen jaqınnan tanıstırıw maqsetinde Qaraqalpaqstan Respublikası aymaqlıq innovaciyalıq rawajlanıw basqarması bas qánigesi E.Abdiganiev, «Jas alımlar akademiyası» JShJ direktorı S.Rustamova hám Jaslar texnoparki qánigesi T.Aymuratovalar qatnasında ilimiy metodikalıq seminar bolıp ótti.

Seminardı filialdıń ilimiy isler hám innovaciyalar boyınsha direktor orınbasarı, pedagogika ilimleri boyınsha filosofiya doktorı (PhD), docent M.Aytımbetov kiris sóz benen ashtı hám basqarıp bardı. Ol óz sózinde búgingi kúnde húrmetli Prezidentimizdiń joqarı bilimlendiriwdi elede rawajlandırıw baǵdarında qabıl etip atırǵan Párman hám qararlarınıń mazmun-mánisine, áhmiyetine ayrıqsha toqtap ótti. Bunnan soń ilim jolında ilimiy izlenisler alıp barıp atırǵan alımlarǵa húkimetimiz tárepinen jaratılǵan imkaniyatlar hám joqarı bilimlendiriw tarawında erisilip atırǵan jetiskenlikler haqqında maǵlıwmatlar berip ótti.

Soń Qaraqalpaqstan Respublikası aymaqlıq innovaciyalıq rawajlanıw basqarmasınan, «Jas alımlar akademiyası» JShJ, hám Jaslar texnoparkinen kelgen qánigeleri sózge shıǵıp, olar óz sózinde bul shólkemlestirilgen jámiyettiń tiykarǵı wáziypaları, aldına qoyǵan rejeleri, maqset hám wáziypaları haqqında qatnasıwshılarǵa keń túrde maǵlıwmat berip ótti hám birge islesiwge shaqırdı.
Seminar qatnasıwshıları ózlerin qızıqtırǵan sorawlarına taraw qánigelerinen juwaplar aldı.

Filial Baspasóz xızmeti.