Xalqımızǵa, ásirese, alıs aymaqlarda jasap atırǵan puqaralarǵa mádeniy dem alıw xızmetlerin kórsetiw dárejesin asırıw, respublikamızdıń barlıq aymaqlarında teatr, cirk hám basqa túrdegi ǵalaba mádeniy hám koncert baǵdarlamaların sistemalı ráwishte jolǵa qoyıw, mádeniyat, kórkem-óner tarawında talantlı, jas atqarıwshılardı izlep tabıw hám qollap-quwatlawǵa qaratılǵan Ózbekstan Respublikası Prezidentiniń 2022-jıl 2-fevral kúni «Mádeniyat hám kórkem-óner tarawın jánede rawajlandırıwǵa qaratılǵan is-ilájlar haqqında»ǵı qararı qabıl etilgen edi.

   Usı qarar tiykarında, sonday-aq, 2022-2026- jıllarǵa mólsherlengen Jańa Ózbekstannıń háreketler strategiyasında «Insan qádirin ulıǵlaw hám belsendi máhálle jılı»nda ámelge asırıwǵa baylanıslı mámleketlik baǵdarlamasına muwapıq Ózbekstan Mámleketlik filarmoniyası Qarakalpaqstan bólimi dóretiwshilik jámáátiniń gezektegi “Lektoriy” koncert baǵdarlaması usı jıldıń 14-oktyabr kúni Ózbekstan mámleketlik dene-tárbiyası hám sport universiteti Nókis filialında kóterińki ruwxta bolıp ótti.

   Keshede filarmoniyanıń “Xalıq-sazları” orkestri, “Ámu tolqını”  hám “Muxalles” ansambilleri ǵayratkerleri tárepinen xalıq namaların shertilip janlı háwazda qosıqlar atqarıldı.

   – Janlı hawazda qosıq tıńlaǵanıń bári-bir zawqı basqasha eken.  Koncert baǵdarlaması júdá kewilli hám mazmunlı ótpekte. Usınday mádeniy kesheni shólkemlestirip filial miynet jámáátiniń, student-jaslardıń bos waqıtların kewilli hám mazmunlı ótkeriwge úles qosıp atırǵan filial administraciyasına hám ózleriniń ónerleri menen biz koncert qatnasıwshılarına zawıq baǵıshlap atırǵan Ózbekstan Mámleketlik filarmoniyası Qarakalpaqstan bólimi dóretiwshilik jámáátine ózlerimizdiń sheksiz minnetdarshılıǵımızdı bildiremiz, – deydi Jaslar menen islesiw, ruwxıylıq hám aǵartıwshılıq isleri boyınsha dekan orınbasarı K.Qulmuratov.

   Koncert baǵdarlaması barısında filial miynet jámááti hám student-jasları Ózbekstan Mámleketlik filarmoniyası Qarakalpaqstan bólimi aǵzaları tárepinen saz-ásbaplardıń kelip shıǵıw tarıyxı menen de keńnen tanıstırılıp barıldı.

   Ózleriniń ónerleri menen filial miynet jámáátiniń hám student-jaslardıń bos waqıtların kewilli hám mazmunlı ótkeriwge úles qosqan Ózbekstan Mámleketlik filarmoniyası Qarakalpaqstan bólimi dóretiwshilik jámáátine ózlerimizdiń sheksiz minnetdarshılıǵımızdı bildiremiz.

Filial Baspasóz xızmeti.