Usı jıldıń 25-noyabr kúni Ózbekstan mámleketlik dene tárbiyası hám sport universiteti Nókis filialında «Dene tárbiyası hám sport tarawı arqalı salamat turmıs tárizin úgit-násiyatlaw: mashqala hám sheshimler» atamasında respublikalıq ilimiy-ámeliy konferenciya ótkerildi. Konferenciyaǵa respublikamızdaǵı joqarı oqıw orınlarınıń professor-oqıtıwshıları, ilimiy izleniwshiler, taraw qánigeleri, pedagog kadrlardı qayta tayarlaw hám qánigeligin jetilistiriw institutları hám ilimiy shólkemlerdiń xızmetkerleri, magistrantlar menen student jaslar qatnastı.

Konferenciyanı filial direktorı, docent B.Mambetov ashtı hám basqarıp bardı. Plenar májilisinde bir qatar ilimpazlardıń «Bárkamal áwladtı tárbiyalawda dene tárbiyanıń áhmiyeti», «Jıllıq cikl dáwirinde gimnastikashılardıń fizikalıq tayarlıǵı», «Sport iskerlik hám súyikli shınıǵıw sıpatında», «Dene tárbiyası hám sport joqarı oqıw orınları studentlerinde tiykarǵı gimnastika boyınsha kásiplik tayarlıǵın qáliplestiriw», «Fitnes, aerobika, yogolar arqalı hayal-qızlarda fizikalıq-estetikalıq mádeniyattı qáliplestiriwdiń pedagogikalıq mexanizmleri», «Sportshılardıń awqatlanıw racionındaǵı paydalı komponentler hám olardıń organizmge tasiri» atamalarındaǵı bayanatları tıńlandı.

Konferenciyanı ótkeriwden tiykarǵı maqset zamanagóy sharayatta dene tárbiyası hám sport tarawında ámelge asırılıp atırǵan reformalardıń insan hám jámiyet turmısında áhmiyetin ashıp beriw, dene tárbiyası hám sporttı keń túrde úgit-násiyatlaw arqalı zıyanlı ádetlerge qarsı immunitetti qáliplestiriw hám rawajlandırıwǵa qaratılǵan ilimiy-pedagogikalıq, metodikalıq usınıslardı islep shıǵıwdan ibarat.

Kúnniń ekinshi yarımında qatnasıwshılar sekciyalarǵa bólinip, dene tárbiyası hám sport arqalı salamat turmıs tárizin úgit-násiyatlawdıń teoriyalıq-metodologiyalıq tiykarları, dene tárbiyası hám sporttı ǵalabalıq rawajlandırıw arqalı zıyanlı ádetlerge qarsı immunitetti qáliplestiriwdiń ilimiy-pedagogikalıq baǵdarları, hár tárepleme rawajlanǵan joqarı mánáwiyatlı shaxslardı qáliplestiriwde dene tárbiyası hám sporttıń áhmiyeti sıyaqlı máseleler boyınsha pikir alıstı. Konferenciyada student-jaslar ózleriniń qızıqtırǵan sorawlarına juwaplar aldı.

Quralbay Keńesbaev,

«Dene tárbiyası teoriyası hám gumanitar pánler» kafedrası oqıtıwshısı.