Joqarı oqıw orınlarında student-jaslar menen islesiw nátiyjeliligin asırıw hám olardıń bos waqıtların mazmunlı shólkemlestiriwge qaratılǵan is-ilájlar kalendar rejesiniń 25-bántinde «Joqarı oqıw orınları studentleri, ásirese, pitkeriwshilerdiń bántligin támiyinlew maqsetinde jumıs beriwshilerdi qamtıp alǵan halda «Karyera kúni miynet yarmarkası»n shólkemlestiriw belgilengen.

 Usı tiykarda 5-may kúni Ózbekstan mámleketlik dene tárbiyası hám sport universiteti Nókis filialında «Karyera kúni miynet yarmarkası» shólkemlestirildi.

 Yarmarkanı Ilimiy isler hám innovaciyalar boyınsha direktor orınbasarı M.Aytımbetov kiris sóz benen ashtı. Ol óz sózinde búgingi kúnde elimizde jaslardıń tıyanaqlı bilim alıp, ózleriniń iyelegen qánigelikleri boyınsha jetik kadrlar bolıp jetilisiwleri ushın jaratılǵan imkaniyatlar haqqında keń túrde maǵlıwmatlar berip ótti hám ózlerinde bar bolǵan bos jumıs orınları menen qatnasıp atırǵan mákeme-kárxana hám shólkemlerdiń basshılarına filial miynet jámááti atınan óz minnetdarshılıǵın bildirdi.

  Miynet yarmarkasın ótkeriwden tiykarǵı maqseti – jumıs beriwshiler menen tuwrıdan-tuwrı sáwbetlesiw arqalı oqıp atırǵan student-jaslarǵa jumıs tabıw, kadrlarǵa zárúrligi bar kárxanalarǵa jumısqa jaylasıw imkaniyatları haqqında aymaqlıq miynet bazarı boyınsha tolıq maǵlıwmat beriw. Jumıs beriwshilerge zárúrli kadrlardı tańlawda ámeliy járdem kórsetiw. Pitkeriwshi kurs studentlerin jumıs penen támiyinlew, olardıń jumıs ornı máselesinde tańlaw imkaniyatın jaratıw.

  Filial tárepinen shólkemlestirilgen «Karyera kúni miynet yarmarkası»nda 15 studentke huqıqıy másláhátler berildi hám 7 student penen jumısqa jaylasıw boyınsha shártnamalar dúzildi.

  Maǵlıwmat ornında házirgi waqıtta Ózbekstan mámleketlik dene tárbiyası hám sport universiteti Nókis filialında kúndizgi, sırtkı, arnawlı sırtqı tálim baǵdarlarında 20 qánigelikte jámi 1225 student bilim almaqta.

  Filialda 2022-2023-oqıw jılında 12 bakalavr tálim baǵdarı boyınsha 408 student pitkerip shıǵıwı kútilmekte.

Filial Baspasóz xızmeti.