Ózbekstan mámleketlik denetárbiyası hám sport universiteti Nókis filialında «Zamanagóy sharayatta joqarı maǵlıwmatlı qánigelerdi tayarlawdıń áhmiyetli mashqalaları» atamasında xalıqaralıq ilimiy-ámeliy konferenciya ótkerildi.

Konferenciyada Tashkent qalasındaǵı Belarus-Ózbekstan qospa tarmaqlararalıq ámeliy texnikalıq kvalifikaciyalar institutı, Poless mámleketlik universiteti, L.N.Gumilev atındaǵı Evraziya milliy universiteti, Volga mámleketlik denetárbiyası, sport hám turizm universiteti hám basqa da sırt el jáne jergilikli joqarı oqıw orınlarınıń professorları, jas ilimpazlar qatnasıp, joqarı maǵlıwmatlı qánigeler tayarlaw hám joqarı bilimlendiriw tarawınıń áhmiyetli mashqalaları, tálim-tárbiya tarawındaǵı sońǵı jetiskenlikler boyınsha óz-ara pikir alıstı.

Konferenciyada «Qazaqstan hám Ózbekstannıń denetárbiya bilimlendiriwi tarawında birge islesiwi», «Aqılıy jaqtan ázzi 13-15 jastaǵı óspirimlerdiń fizikalıq hám kognitivlik qábiletlerine florbol menen shuǵıllanıwdıń tásiri»,  «Sociallıq transformaciya procesinde zamanagóy bilimlendiriwge bolǵan múnásibettiń sociologiyalıq analizi» hám basqa da temalarda bayanatlar jasaldı.

Onlayn hám oflayn formatta ótkerilgen konferenciya 5 baǵdar tiykarında alıp barıldı.

Konferenciya juwmaǵında talqılanǵan máseleler boyınsha ulıwma juwmaqqa kelindi.

Qaraqalpaqstan xabar agentligi.