Joqarı bilimlendiriw, ilim hám innovaciyalar ministrligi tárepinen bakalavr tálim baǵdarlarınıń oqıw ádebiyatların qaraqalpaq tiline awdarma islew hám baspadan shıǵarıw ushın qarjı ajıratılǵan edi.

Usı qarjılar esabınan Ózbekstan mámleketlik dene tárbiyası hám sport universiteti Nókis filialı professor-oqıtıwshıları tárepinen toǵız atamadaǵı kitapları baspa júzin kórdi.

Búgin filialda professor-oqıtıwshılar tárepinen tayarlanıp ministrlik qarjıları esabınan baspadan shıqqan toǵız atamadaǵı oqıw ádebiyatlardıń kórgizbesi shólkemlestirildi.

Kórgizbeni filial direktorı B.Mambetov kiris sóz benen ashtı hám jaratılǵan múmkinshiliklerden durıs paydalanıp oqıw ádebiyatların baspadan shıǵarǵan professor-oqıtıwshılarǵa óz minnetdarshılıǵın bildirdi. Sonıń menen birge ilim jolı, ilim pidayılarınan qanshelli mashaqatlı miynetdi talap etetuǵınlıǵın atap ótti hám bárshe professor-oqıtıwshılarǵa bul jolda sabır, kúsh-ǵayrat tiledi.

Bunnan soń bir qatar filial professor-oqıtıwshıları sózge shıǵıp oqıw ádebiyatları baspadan shıqqan kásipleslerin qutlıqladı.

Kórgizbege filial professor-oqıtıwshılar menen Ózbekstan mámleketlik kórkem óner hám mádeniyat institutı Nókis filialınıń ámeliyatshı studentleri qatnastı.

Filial Baspasóz xızmeti.