Joqarı bilimlendiriw tarawındaǵı ózgerisler haqqında studentlerdiń ata-analarına keń túrde maǵlıwmat beriw, filialdıń ishki imkaniyatları menen jaqınnan tanıstırıw, olar menen jaqınnan tanısıw hám sol arqalı tıǵız baylanısta birge islesiwdi jolǵa qoyıw maqsetinde Ózbekstan mámleketlik dene tárbiyası hám sport universiteti Nókis filialında ata-analar ushırasıwı shólkemlestirildi.

 Ushırasıwdı filial direktorı, professor Bayrambay Erimbetov kiris sóz benen ashtı hám basqarıp bardı. Ol óz sózinde studentlerdiń sabaqlardı tolıq ózlestiriwleri ushın oqıw ornında jaratılǵan imkaniyatlar, filialdıń usı kúnge shekem erisken jetiskenlikleri hám aldaǵı rejeleri haqkında maǵlıwmat berip ótti.

 – Filial direktorı qatnasında ótkerilgen búgingi ata-analar májilisinde bizler ózlerimiz ushın júdá kóp kerekli maǵlıwmatlardı aldıq. Sońǵı jılları joqarı oqıw orınları sistemasına engizilgen kredit moduli haqqında tolıq túsinikke iye boldıq. Filial basshıları perzentlerimizdiń kelesheginiń aydın bolıwın táminlew ushın biz ata-analardı birge tıǵız baylanısta islesiwge shaqırımaqta. Negizinde, biz ata-analar perzentlerimizdiń keleshegi ushın qayǵırıwımız kerek.

Direktordıń jeke ózi oqıw barısında studentler dus kelip atırǵan mashqalaların saplastırıw, ata-analardıń múrájáátlerin tıńlaw hám pikir-usınısların biliw maqsetinde telegram tarmaǵında ata-analar gruppasın ashıw usınısın bildirip atır. Biz bunnan júdá quwanıshlımız hám qollap-quwatlaymız deydi, – ata-analardıń biri biz benen sáwbeti barısında.

 Shólkemlestirilgen jıynalıs barısında ata-analar oqıw barısı menen baylanıslı bolǵan sorawlarına juwaplar aldı.

Filial Baspasóz xızmeti.