Ózbekstan mámleketlik dene tárbiyası hám sport universiteti Nókis filialı májilisler zalında «Diniy ekstremizm hám terrorizm, missionerlik — jámiyet rawajlanıwına qáwip» atamasında student-jaslar menen ushırasıw bolıp ótti.

Ushırasıwdı filial direktorı, professor B.Erimbetov ashtı hám kelgen miymanlardı tanıstırıp ótti.

Soń Din isleri boyınsha komitetiniń Qaraqalpaqstan Respublikası aymaqlıq basqarması Hayal-qızlar máseleleri boyınsha qánigesi H.Ibraimova, QR Ishki isler ministrligi Terrorizmge qarsı gúresiw basqarması bólim baslıǵı, mayor R.Nurjanov, respublikalıq AIJS ke qarsı gúresiw orayı shıpakeri A.Aminovalar sózge shıqtı.

Taraw qánigeleri jaslar arasında hár qıylı júz beriwi múmkin bolǵan huqıqbuzarlıq hám jınayatshılıqtıń aldın alıw baǵdarında islenip atırǵan jumıslar, ásirese, studentlerge búgingi kúnde sociallıq tarmaqlardan paydalanǵanda abaylı bolıwǵa hám hár qanday túrdegi jınayattıń qurbanına aylanıp qalmawǵa shaqırdı. Sonday-aq, AIV, AIJS kesellikleriniń juǵıw jolları hám onı emlew profilaktikası haqqında túsinikler berip ótti.

Ushırasıw barısında studentler ózleriniń qızıqtırǵan sorawlarına taraw qánigelerinen juwaplar aldı.

Soń iláj qatnasıwshılarına profilaktikalıq mazmundaǵı qollanbalar tarqatıldı hám videorolik qoyıp berildi.

Filial Baspasóz xızmeti.