Qıtaydıń Xanchjou qalasında bolıp ótken XIX Aziya oyınlarında Ózbekstan saylandı komandası aǵzaları qılıshpazlıq sport túriniń sablya baǵdarı boyınsha komandalıq esapta Yaponiyalı qılıshpaz qızlardı 45:42 esabında jeńip altın medaldı qolǵa kirgiziwi tarıyxıy nátiyje boldı. Saylandı komanda quramı aǵzası filialımız studenti Zaynab Dayıbekova qılıshpaz qızlarımızdıń komandalıq esapta altın medaldı qolǵa kirgiziwde salmaqlı úles qosqan edi.

Búgin Ózbekstan mámleketlik dene tárbiyası hám sport universiteti Nókis filialı direktorı, professor B.Erimbetov qılıshpaz studentimiz Zaynab Dayıbekovanı qabılladı hám erisken tabısı menen qutlıqlap, filial jámááti tárepinen tayarlanǵan estelik sawǵaların tapsırdı.

Soń Zaynab Dayıbekova qatnasıwında filial studentleri menen «Chempion hám jaslar» atamasında ushırasıw bolıp ótti.

Ushırasıwda sózge shıqqanlar sportshımızdı qolǵa kirgizgen jeńisi menen qutlıqladı hám aldaǵı jarıslarda tabıslar tiledi. Soń Zaynab Dayıbekova hám onıń anası bul sport túriniń qıyınshılıqları, erisken jetiskenlikleri haqqında jıynalǵanlarǵa keń túrde maǵlıwmat berip ótti.

Maǵlıwmat ornında;  qılıshpazlıqtıń sablya túri boyınsha ótkerilgen Aziya oyınlarınıń final basqıshında Ózbekstan mámleketlik dene tárbiyası hám sport universiteti Nókis filialı studenti Zaynab Dayıbekova jeke tártipte qola medalın. Komandalıq esapta altın medaldı qolǵa kirgizdi.

Filial Baspasóz xızmeti.