Usı jıldıń 2-noyabr kúni Polessk mámleket universiteti rektorı Valeriy Ivanovich Dunay Ózbekstan mámleketlik dene tárbiyası hám sport universiteti Nókis filialında boldı. Miymanlardı Ózbekstan mámleketlik dene tárbiyası hám sport universiteti Nókis filialı direktorı, professor Erimbetov Bayrambay Karlıbaevich kútip aldı.

Dáslep, eki joqarı oqıw ornı arasında birge islesiwdi elde rawajlandırıw boyınsha sáwbetlesiw alıp barıldı. Sáwbetlesiw barısında Ózbekstan mámleketlik dene tárbiyası hám sport universiteti Nókis filialı hám Polessk mámleket universiteti arasında xalıqaralıq birge islesiw, studentler, ilimiy xızmetkerler, oqıtıwshılardıń tájiriybe almasıw, sonday-aq, lekciyalar, konferenciyalar, seminarlar ótkeriw, oqıw processin jetilistiriw, zamanagóy oqıtıw usılları hám sistemalarınan paydalanıw, bul tarawda innovaciyalıq texnologiyalardı qollaw, qospa tálim tiykarında magistratura qánigeligin ashıw boyınsha óz-ara shártnamalar dúzildi.

 Filial májilisler zalında Polessk mámleket universiteti rektorı Valeriy Ivanovich Dunay hám xalıqaralıq bólimi baslıǵı Aksenchik Natalya Vladimirovnalar student-jaslar menen ushırastı.

Ushırasıwdı filial direktorı, professor B.Erimbetov kiris sóz benen ashtı hám májilis qatnasıwshıların kelgen miymanlar menen jaqınnan tanıstırıp ótti. Polessk mámleket universiteti rektorı Valeriy Ivanovich Dunay universitetiniń ishki imkaniyatları hám ol jerde jaratılǵan múmkinshilikler haqqında keń túrde maǵlıwmatlar berip ótti hám student-jaslardıń qızıqtırǵan sorawlarına juwaplar berdi.

Miymanlar «Respublikalıq suw sportı túrlerine qánigelestirilgen balalar hám jas óspirimler sport mektebi» hám oraylıq «Turan» stadionın barıp kórdi.

Filial Baspasóz xızmeti.