Studentler arasında júziw sport túrin elede rawajlandırıw, olardıń ishinen filial saylandı komandasın dúziw, Qaraqalpaqstan kubogine talantlı sportshılardı tańlap alıw, Respublika birinshiligine qatnasıp, 20-25-noyabr kúnleri aralıǵında bolıp ótetuǵın Ózbekstan kubogına jollama alıw maqsetinde Respublikalıq suw sportı túrleri boyınsha qánigelestirilgen sport mektebinde Ózbekstan mámleketlik dene tárbiyası hám sport universiteti Nókis filialı student-jasları arasında júziw sportınan «Direktor kubogı» ushın jarıs bolıp ótti.

Sport jarısın filialı direktorınıń Jaslar máseleleri hám ruwxıylıq-aǵartıwshılıq isleri boyınsha birinshi orınbasarı R.Xaydarov kiris sóz benen ashıp berdi hám qatnasıwshılarǵa tabıslar tiledi.

Onda qatnasıwshılar 100 metirge bras, butterfly, shalqanshasına hám erkin usılda júziw shártleri boyınsha óz-ara bellesti.

Qızıqlı hám kewilli ótken jarıs sońında jeńimpaz sportshılar anıqlanıp, olar Ózbekstan mámleketlik dene tárbiyası hám sport universiteti Nókis filialı basshılıǵı tárepinen tayarlanǵan Diplom hám estelik sawǵaları menen sıylıqlanadı.

Birinshi orın jeńimpazları jarıstıń keyingi basqıshına jollama aldı.

Bibimaryam Qaljanova,

QMU jurnalistika kafedrası studenti.