8-dekabr – Ózbekstan Respublikası Konstituciyası qabıl etilgen kún. Bıyıl Bas nızamımızdıń qabıl etilgenine 31 jıl tolmaqta. Ózbekstan mámleketlik dene tárbiyası hám sport universiteti Nókis filialında usı sánege arnalǵan «Ózbekstan Respublikası Konstituciyasınıń otız bir jıllıǵı» atamasında saltanatlı ilaj bolıp ótti.

 Ózbekstan hám Qaraqalpaqstan Respublikalarınıń mámleketlik gimnleri menen baslanǵan ilajdı filial direktorınıń oqıw isleri boyınsha orınbasarı B.Utemuratov ashıp berdi hám basqarıp bardı.

 Ilajǵa Qaraqalpaqstan Respublikası Konstituciyalıq baqlaw komiteti baslıǵı P.Aytniyazov, Qaraqalpaqstan Respublikası Ádilik ministrligi bas másláhátshisi N.Berdiniyazova, Qaraqalpaqstan Respublikası Prokuraturası bólim baslıǵı A.Abdikarimovlar hám filialdıń professor-oqıtıwshıları, student-jaslar qatnastı.

 Ilajda sózge shıqanlar bársheni Ózbekstan Respublikası Konstituciyasınıń  otız bir jıllıǵı menen qızǵın qutlıqladı hám 1992-jılı 8-dekabr kúni ǵárezsiz Ózbekstannıń Konstituciyası qabıl etildi.

Konstituciyanı islep shıǵıwda nızamshılıqtaǵı aldınǵı sırt el tájiriybeleri menen birgelikte xalqımızdıń kóp ásirlik mentaliteti, jasaw sharayatı, ata-babalardan miyras bolıp kiyatırǵan úrp-ádetleri de basshılıqqa alınǵanlıǵı maqtanısh penen tilge alındı.

Atap ótilgenindey, tiykarǵı nızamımız óziniń tereń oylanǵan principleri hám qaǵıydaları menen ajıralıp, elimizdiń táǵdirin, hár bir insannıń huqıq jáne erkinliklerin belgilewde áhmiyetli hújjet bolıp esaplanadı.

 Sonday-aq, elimizde nızam ústinligin támiyinlew arqalı puqaralıq jámiyetin qurıw, bunıń ushın xalqımızdıń huqıqıy mádeniyatın arttırıw, xalqımızdıń búgingi ómirden razı bolıp jasawı ushın olarǵa múnásip turmıs sharayatların jaratıp beriw baǵdarında sońǵı jıllardaǵı alıp barılıp atırǵan jumıslar ayrıqsha atap ótildi.

 Saltanatlı ilaj sońında “Jańa Konstituciya – rawajlanıw nızamı” atamasında ilimiy maqalalar tańlawı jeńimpazların sıylıqlaw máresimi bolıp ótti.

Filial Baspasóz xızmeti.