Kitap – insannıń eń jaqın dostı, aqıllı sáwbetlesi hám salıstırıp bolmaytuǵın sırlası. Insan ushın kitaptan  jaqın másláhátshi tabılmasa  kerek. Bul dúnyada biz kitaptan ótmishimizdi, tariyxımızdı biliwimiz  múmkin.

 Kitaplarda ótmishtiń aqıl-parasatı jasaydı. Sebebi, kitap qálem  menen  emes, aqıl  menen  jazıladı. Ol   qanshelli qızıqlı  bolsa, sonshelli adamǵa lázzet baǵıshlaydı. Kitap bárshe baylıqlardıń, gózzalıqlardıń, aqıldıń bulaǵı desek asıra  aytqan bolmaymız.  Kitaptı oqıp juwmaqlaw jaqsı dos arttırıw menen barabar. Kitap oqıǵan adam óziniń eski dostın  qayta ushıratqanday boladı.

 Kitap – bul kerek emes nárselerdi umıttıradı, jańa kóz-qarastı, oy-pikirdi rawajlandırıwǵa jol ashadı. Waqıt ótedi, álbette, zımırap ótip atırǵan waqıttan paydalanıw ózimizge baylanıslı. Aqıllı, tárbiyalı bolıwdı baslı maqsetimiz etip qoysaq, álbette, onı ámelge asırıw ushın ilimli, bilimli bolıwımız kerek.

 Ózimizde alǵa umtılıw, talapshanlıq bolsa, nátiyje boladı. Eger  ózimizde alǵa umtılıwshılıq, talapshanlıq bolmasa, qanshelli ustaz úyretkeni menen  nátiyje bermeydi. Sonıń ushın kúnine bir nárse úyrenip, jańalıqlarǵa umtılıwımız kerek. Jaqsı nárselerdi islew ushın jámiyetke payda keltiriw ushın ilimiy, ádebiy kitaplardı oqıwımız zárúr. Eger alǵan bilimdi ámelde, yaǵnıy, turmısta qollana almasaq kóp biliwdiń paydası joq. Kitap oqımaw ruwxıy jaqtan hálsizlikke alıp keledi. Al, kitap oqıw adam turmısınıń barlıq tarawlarına unamlı tásir kórsetedi. Sonıda aytıp ótiwimiz kerek, ilimpazlardıń izertlewlerine qaraǵanda kitap oqıw adamdaǵı sharshaw, túskinlikke túsiw jaǵdayınıń aldın aladı eken. Bul jaǵday adamlardıń kitap oqıwı ushın paydalı ekenligin bildiredi.

Karima TÓREShOVA,

Ózbekstan mámleketlik dene tárbiyası hám sport universiteti Nókis filialı Málimleme resurs orayı baslıǵı.