Ózbekstan Respublikası Joqarı bilimlendiriw, ilim hám innovaciyalar ministrliginiń 2023-jıl 2-may kúngi 118-sanlı buyrıǵına muwapıq milliy sport túrleri hám xalıq oyınların ǵalabalıq rawajlandırıwdıń ilimiy-ámeliy tiykarların jetilistiriw, ilimiy tiykarlanǵan pikir hám usınısların islep shıǵıw maqsetinde búgin Ózbekstan mámleketlik dene tárbiyası hám sport universiteti Nókis filialında «Milliy sport túrleri hám xalıq oyınların ǵalabalıq rawajlandırıwdıń ilimiy-metodikalıq tiykarların jetilistiriw» atamasında respublikalıq ilimiy-ámeliy konferenciya bolıp ótti.

 Konferenciyanı Ózbekstan mámleketlik dene tárbiyası hám sport universiteti Nókis filialı direktorı, professor Bayrambay Erimbetov kiris sóz benen ashıp berdi.

 Oǵan joqarı oqıw orınlarınıń professor-oqıtıwshıları, ilimiy izertlewshiler, taraw qánigeleri, pedagog kadrlardı qayta tayarlaw hám qánigeligin arttırıw institutı hám ilimiy shólkemlerdiń xızmetkerleri, magistrantlar, student-jaslar qatnastı.

 Onda bir qatar ilimpazlardıń “Milliy hám xalıq sport oyını “lańgi”ni ǵalabalıq en jaydırıw”, “Psixologiyalıq tayarlıq sportshılardıń natiyjege erisıw quralı sıpatında”, “Sanogen pikirlewdi rawajlandırıwda milliy háreketli oyınlardan paydalanıwdıń zárúrli faktorları” “Sportshılardıń ruwxıy sergeklik: erkin gúres boyınsha sportshı hayal-qızlar ushın psixologiyalıq tayarlıǵın rawajlandırıw” hám “Top penen islew texnikaların, studentler komandası futbolshılarında qollaw” hám taǵı basqa temalardaǵı bayanatları tıńlandı.

 Konferenciya sońında bayanatshı hám qatnasıwshılar tárepinen bildirilgen pikir hám usınıslardı inabatqa alǵan halda milliy sport túrleri hám xalıq oyınların ǵalabalıq rawajlandırıw is-ilájlar belgilep alındı.

 Belsene qatnasqan izleniwshiler hám student-jaslar filial administraciyası tárepinen sertifikat hám estelik sawǵaları menen sıylıqlandı.

 Filial Baspasóz xızmeti.