Jaslardı áskeriy Watansúyiwshilik ruwxında tárbiyalaw, olar arasında salamat turmıs tárizin qáliplestiriw hám Qurallı Kúshler qatarında xızmet etiwge bolǵan qızıǵıwshılıqların arttırıw maqsetinde Jaslar menen islesiw, ruwxıylıq hám aǵartıwshılıq bólimi baslaması menen Nókis qalalıq ishki isler organları jumısların muwapıqlastırıw basqarması 4-sanlı ishki isler bólimi menen birgelikte Ózbekstan mámleketlik dene tárbiyası hám sport universiteti Nókis filialı studentleri arasında «Armiya – ómir mektebi» súreni astında áskeriy sport jarısı ótkerildi.

 Onda filial studentleri arasınan dúzilgen komanda aǵzaları óz-ara jarıs shártleri tiykarında turnikte tartınıw, tas kóteriw, armrestling hám estafeta shártleri boyınsha kúsh sınastı.

 Qızǵın bellesiwlerge bay tárizde ótkerilgen jarıs juwmaǵında 1-orındı «Erkin gúres», 2-orındı «Turan batırları» hám 3-orındı «Futbol» komandası aǵzaları iyeledi.

 Jeńimpaz bolǵan komanda aǵzaları filial administraciyası tárepinen Diplom menen sıylıqlandı.

Filial Baspasóz xızmeti.