Qaraqalpaq ádebiyatınıń qos bayteregi Ózbekstan Qaharmanı, Ózbekstan hám Qaraqalpaqstan xalıq shayırı Ibrayım Yusupov hám Ózbekstan Qaharmanı, Ózbekstan hám Qaraqalpaqstan xalıq jazıwshısı Tólepbergen Qayıpbergenovlardıń tuwılǵanına 95 jıl toldı.

 Usı múnásibet penen Ózbekstan mámleketlik dene tárbiyası hám sport universiteti Nókis filialında «Qaraqalpaq xalqınıń qos bayteregi» atamasında ádebiy keshe bolıp ótti.

 Kesheni filial direktorınıń Jaslar máseleleri, ruwxıylıq hám aǵartıwshılıq isleri boyınsha birinshi orınbasarı R.Xaydarov ashtı hám studentlerdi miyman menen jaqınnan tanıstırdı.

 Ádebiy keshe miymanı Ózbekstan Respublikasına miyneti sińgen mádeniyat xızmetkeri, «Shuhrat» medalı iyesi, filologiya ilimleri kandidatı, docent Baxtiyar Genjemuratov student-jaslarǵa qaraqalpaq ádebiyatınıń qos bayteregi bolǵan jazıwshı hám shayırdıń ómiri, miynet jolı, olardıń qálemine tiyisli kórkem dóretpeleri haqqında keń túrde maǵlıwmatlar berip ótti.

 Ataqlı jazıwshı hám shayırdıń atın máńgilestiriw boyınsha elimizde alıp barılıp atırǵan jumıslarǵada toqtap ótti. Yaǵnıy, atap aytqanda qalamızda úlken kóshelerge jazıwshı, shayırdıń atlarınıń qoyılıwı, ásirese, Tashkent qalasındaǵı Jazıwshılar baǵında sawlatlı esteliginiń ornatılıwın ayrıqsha maqtanısh penen tilge aldı.

Filial Baspasóz xızmeti.