Búgin 16-may kúni Ózbekstan mámleketlik dene tárbiyası hám sport universiteti Nókis filialında «Dene tárbiyası hám sport tarawında jetik qánigelerdi tayarlawda sport psixologiyası hám pedagogikası hámde innovaciyalıq bilimlendiriw texnologiyalarınıń áhmiyeti» atamasında xalıqaralıq ilimiy-ámeliy konferenciya óz jumısın basladı.

 Konferenciyaǵa elimizdegi joqarı oqıw orınlarınan tısqarı, Germaniya, Hindstan, Qazaqstan, Qırǵızstan hám Mongoliya mámleketlerinen ilimpazlar, sport ekspertleri, trenerler hám jas izleniwshiler qatnaspaqta.

 Konferenciyanıń ashılıw máresiminde Qaraqalpaqstan Respublikası sport ministriniń orınbasarı Azamat Qalbaev, Ózbekstan mámleketlik dene tárbiyası hám sport universiteti Nókis filialı direktorı, professor Bayrambay Erimbetovlar shıǵıp sóylep, sońǵı jılları pútkil dúnya júzinde bolǵanı sıyaqlı biziń elimizde de Prezidentimizdiń basshılıǵında denet árbiyası hám sport tarawın rawajlandırıwǵa ayrıqsha itibar qaratılıp atırǵanın hám usınday qollap-quwatlawlardıń nátiyjesinde mámleketimiz sportshıları tárepinen xalıqaralıq arenalarda úlken tabıslar qolǵa kirgizilip atırǵanın aytıp ótti. Sonday-aq, olar óz sózlerinde tarawdı ele de rawajlandırıw ushın, ilim menen tıǵız birge islesiw zárúrligine de toqtap, konferenciyanıń aldaǵı jumıslarına tabıslar tiledi.

 Bunnan soń konferenciya óz jumısın baslap,  Ózbekstan mámleketlik dene tárbiyası hám sport universiteti professorı F.Kerimov, Germaniyanıń Kyoln universiteti professorı G.Korobeynikov hám basqalar  tárepinen búgingi kúnniń áhmiyetli máseleleri boyınsha bayanatlar jasalıp, bul boyınsha ilimpaz hám qánigeler óz pikirlerin bildirdi.

 Xalıqaralıq ilimiy-ámeliy konferenciya óz jumısın 17-may kúni  de dawam etedi.

Filial Baspasóz xızmeti.