Usı jıldıń 20-sentyabr sánesinen baslap Ózbekstan Respublikası Joqarı bilimlendiriw, ilim hám innovaciyalar ministrligi, Sport ministrligi hám Jaslar isleri agentligi menen birgelikte joqarı oqıw orınları studentleri arasında “Bes baslama olimpiadası” na start berilgen edi.

  Búgin Ózbekstan mámleketlik dene tárbiyası hám sport universiteti Nókis filialında “Bes baslama olimpiadası” sheńberinde sporttıń «stol tennis» túrinen gruppalar arasında fakultet birinshiligi ótkerildi.

  Birinshilikti filial direktorınıń Jaslar máseleleri hám ruwxıy-aǵartıwshılıq isleri boyınsha orınbasarı R.Xaydarov kiris sóz benen ashtı hám qatnasıwshılarǵa tabıslar tiledi.

 Birinshi orın hám keyingi basqıshqa jollama alıw ushın qızǵın bellesiwlerge bay tárizde bolıp ótken jarıs juwmaǵında er balalar arasında 1-orın «voleybol» qánigeliginiń 1-kurs studenti Q.Dauletmuratovqa, 2-orın «mektepke shekemgi baslanǵısh tálimde dene tárbiyası hám sport» qánigeliginiń 3-kurs studenti Muxitdin Qoshqarovqa hám 3-orın «qol tobı» qánigeliginiń 1-kurs studenti Baxtiyar Qazaqbaevqa nesip etken bolsa, al, qızlar arasında 1-orın «voleybol» qánigeliginiń 1-kurs studenti Dilbar Kenjebaevaǵa, 2-orın «basketbol» qánigeliginiń 2-kurs studenti Jasmina Uralbaevaǵa hám 3-orın «oq jaydan oq atıw» qánigeliginiń 1-kurs studenti Mabluda Rejepovalarǵa nesip etti.

  Jarıs juwmaǵında sıylı orındı iyelegen qatnasıwshılar “Bes baslama olimpiadası”nıń keyingi basqıshına jollama aldı.

Filial Baspasóz xızmeti.