Ózbekstan mámleketlik dene tárbiyası hám sport universiteti Nókis filialında «Máripat taratıp» joybarı sheńberinde Qaraqalpaqstan xalıq jazıwshısı, belgili jurnalist Orazbay Ábdiraxmanov, Ózbekstanda xızmet kórsetken mádeniyat xızmetkeri hám Qaraqalpaqstan xalıq shayırı Rustam Musulman hám shayır Zebo Mirzo menen ushırasıw bolıp ótti.

Ilajdı Ózbekstan mámleketlik dene tárbiyası hám sport universiteti Nókis filialı direktorı, professor Bayrambay Erimbetov kiris sóz benen ashtı hám student-jaslardı kelgen miymanlardıń ómiri hám dóretiwshiligi menen jaqınnan tanıstırıp ótti.

Ushırasıwda Qaraqalpaqstan xalıq jazıwshısı, filologiya ilimleriniń kandidatı A.Ábdiev, O.Ábdiraxmanov, R.Musulman hám Zebo Mirzo sózge shıǵıp búgingi kúnde elimizde ruwxıylıqtı elede joqarılatıw baǵdarında ámlelge asırılıp atırǵan jumıslar haqqında toqtalıp, jaslar kewlinde milliy ádebiyatımızǵa bolǵan mehir-muxabbatı jánede kúsheytiw maqsetinde respublikamız boylap shólkemlestirilip atırǵan «Máripat taratıp» joybarınıń áhmiyeti haqqında toqtalıp ótti. Sonıń menen birge Ózbekstan mámleketlik dene tárbiyası hám sprot universiteti Nókis filialında bilim atıp atırǵan studentlerdiń Ózbekstan, Aziya hám jáhán xalıq-aralıq sport arenalarında erisip atırǵan tabısların maqtanısh penen tilge alıp, ózleriniń dóretiwshiligi hám turmıslıq tájriybelerinen kelip shıǵıp studentler menen pikirlesti.

Ádebiyat bostanınıń kórnekli wákileri bolǵan O.Ábdiraxmanov, A.Ábdiev, R.Musulman hám Zebo Mirzo Nókis qalasındaǵı 6-sanlı ulıwma bilim beriw mektebinde bolıp, ol jerde oqıwshılar menen sáwbetlesti. Ushırasıwdan soń joybar sheńberinde miymanlar filial átirapındaǵı jer maydanına miyweli terek nállerin ekti. Soń miymanlar filial Málimleme resurs orayınıń professor-oqıtıwshılar hám student-jaslar ushın jaratılǵan imkaniyatlar, saqlanıp atırǵan sabaqlıq, kórkem ádebiyatlar hám gazeta-jurnnallardıń tigindileri menen jaqınnan tanıstı. Student-jaslardı miymanlardıń dóretiwshiligi menen jaqınnan tanıstırıw maqsetinde «Zakawat» intellektual oyını ótkerildi. Onda qatnasıwshılar miymanlardıń dóretiwshilik iskerliginen dúzilgen sorawlar tiykarında kúsh sınastı. Oyın juwmaǵında jeńimpaz komanda aǵzalarına ádebiyat bostanınıń belgili wákilleri tárepinen Húrmet jarlıqları saltanatlı túrde tapsırıldı.

Ilaj juwmaǵında miymanlar Mırza Uluǵbek háykeli aldına gúl qoydı. «Máripat taratıp» joybarı sheńberinde shólkemlestirilgen ilajlar studentlerde jaqsı tásirler qaldırdı.

Filial Baspasóz xızmeti.