Dene tárbiyası hám sport boyınsha jetik qánigelerdıń óz-ara tájiriybe almasıwın támiyinlew, úlken sporttaǵı mashqalalardıń sheshimin birgelikte tabıw boyınsha óz-ara kelisimler dúziw hám tarawdı rawajlandırıw boyınsha rejeler islep shıǵıw maqsetinde usı jıldıń 6-noyabr kúni Ózbekstan mámleketlik dene tárbiyası hám sport universiteti Nókis filialında «Jas awladtıń tárbiyasında milliy sport oyınlarınıń áhmiyeti: mashqala hám sheshimleri» atamasında Ózbekstan Respublikası kóleminde ilimiy-ámeliy ilimiy-ámeliy konferenciya óz jumısın basladı.

Konferenciyaǵa respublikamızdaǵı joqarı oqıw orınlarınıń professor-oqıtıwshıları, ilimiy izleniwshiler, taraw qánigeleri, magistrantlar menen student-jaslar qatnastı.

Konferenciyanı Jaslar máseleleri hám ruwxıy-aǵartıwshılıq isleri boyınsha direktordıń birinshi orınbasarı R.Xaydarov kiris sóz benen ashıp berdi hám ol óz sózinde sońǵı jılları mámleketimizde dene tárbiyası hám sport tarawın rawajlandırıw boyınsha húkimetimiz tárepinen alıp barılıp atırǵan reformalar, tarawda ámelge asırılıp atırılǵan ózgerislerdiń tiykarǵı maqseti xalıq salamatlıǵın elede bekkemlew hám hár bir sport túrin rawajlandırıwǵa ayrıqsha itibar qaratılıp atırǵanlıǵın ayrıqsha atap ótti. Sonıń menen birge tarawdı ele de rawajlandırıw ushın ilim menen tıǵız birge islesiw zárúrligine de toqtap, ánjumannıń aldaǵı jumıslarına tabıslar tiledi.

Ózbekstan hám respublikamızdaǵı joqarı oqıw orınlarınıń professor-oqıtıwshıları, doktorantlar, erkin izleniwshiler, magistrantlar hám filialdıń ziyrek studentler «Dene tárbiyası hám sport tarawında qánigelerdiń tájiriybesin rawajlandırıw jolları», «Milliy háreketli oyınlardıń mektep oqıwshılarınıń fiziologiyalıq rawajlanıwındaǵı roli», «Sporttı rawajlandırıwdıń aktual mashqalaları hám tiykarǵı jónelisleri», «Kishi voleybol sport túrine tayarlaw akmeologiyasın voleybolǵa integraciyalaw nátiyjeliligi» sıyaqlı atamadaǵı búgingi kúnniń áhmiyetli máseleleri boyınsha bayanatlar jasalıp, bul boyınsha ilimpaz hám qánigeler óz pikirlerin bildirdi.

Konferenciya belsene qatnasqan professor-oqıtıwshılar hám studentlerge Sertifikat tapsırıldı. Ánjuman óz jumısın sekciyalarǵa bólinip dawam etti.

Filial Baspasóz xızmeti.