Aldın xabar bergenimizdey 8-10-noyabr kúnleri aralıǵında Qazaqstan Respublikasınıń Astana qalasında sporttıń sambo túninen bolıp ótken Jáhán chempionatında Ózbekstan saylandı komandası quramında Ózbekstan mámleketlik dene tárbiyası hám sport universiteti Nókis filialı «Dzyu-do» qánigeliginiń 3-kurs studenti Shahzoda Azatova -59 killogram salmaq kategoriyasında qatnasıp, altın medaldı alıp, jáhán chempionı bolǵan edi.

Búgin Shahzoda Azatova Nókis temirjol vokzalında Qaraqalpaqstan Respublikası Sport ministrligi, filial direktorınıń Jaslar máseleleri hám ruwxıy-aǵartıwshılıq isleri boyınsha birinshi orınbasarı, professor-oqıtıwshılar,  sportshınıń ata-anası, dosları,  respublikamızdıń sport tarawı hám ǵalaba xabar quralları wákilleri qatnasıwında saltanatlı túrde kútip alındı.

Ilajda sózge shıqqanlar sportshını qolǵa kirgizgen tabısı menen qızǵın qutlıqladı hám aldaǵı jarıslarda tabıslar tiledi.

Filial Baspasóz xızmeti.