8-dekabr – Ózbekstan Respublikası Konstituciyası qabıl etilgen kún

Ózbekstan mámleketlik dene tárbiyası hám sport universiteti Nókis filialında Ózbekstan Respublikası Konstituciyası  qabıl etilgenliginiń 32 jıllıǵı múnásibeti menen ilaj bolıp ótti.

Onda Qaraqalpaqstan Respublikası Joqarǵı Keńesiniń deputatı U.Jalmenov, Qaraqalpaqstan Respublikası Ádillik ministri E.Tursunov, Qaraqalpaqstan Respublikası prokurorınıń orınbasarı Sh.Muxamatov, professor-oqıtıwshılar hám student-jaslar qatnastı.

Ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.

Ilajdı filial direktorı, professor B.Erimbetov alıp bardı.

Qaraqalpaqstan Respublikası Joqarǵı Keńesiniń deputatı U.Jalmenov shıǵıp sóylep, filial jámáátin Ózbekstan Respublikası Konstituciyasınıń  qabıl etilgenliginiń 32 jıllıǵı menen qızǵın qutlıqlap, elimizdiń dúnya siyasiy maydanında ǵárezsiz mámleket sıpatında óz ornına iye bolıwı, rawajlanıw jolın belgilep, jıldan-jılǵa abırayınıń artıp barıwı, sonday-aq, xalıqtıń abadanlıǵın támiyinlewde – Konstituciyanıń ornı hám áhmiyeti joqarı ekenligin atap ótti.

Ilajda Qaraqalpaqstan Respublikası Ádillik ministri E.Tursunov, Qaraqalpaqstan Respublikası prokurorınıń orınbasarı Sh.Muxamatovlar shıǵıp sóylep, Konstituciya mámlekettiń tiykarǵı nızamı bolıp, hár bir mámlekettiń keleshegi usı hújjette óz sáwleleniwin tapqanlıǵın atap ótip, búgin elimizde júz berip atırǵan jańalanıwlar, demokratiyalıq huqıqıy mámleket qurıw, puqaralıq jámiyetin qáliplestiriw jolında erisip atırǵan jetiskenliklerimizdiń barlıǵı Konstituciyada kórsetilgen tiykarǵı principlerdiń turmısqa tolıq engiziliwi menen baylanıslı ekenligin óz bayanatlarında keltirip ótti.

Ilajda atap ótilgenindey, tiykarǵı nızamımız óziniń tereń oylanǵan principleri hám qaǵıydaları menen ajıralıp, elimizdiń táǵdirin, hár bir insannıń huqıqları menen erkinliklerin belgilewde áhmiyetli hújjet bolıp esaplanadı.

Ilaj sońında Qaraqalpaqstan Respublikası Ádillik ministrligi tárepinen Ózbekstan Respublikası Konstituciyası professor-oqıtıwshı hám student-jaslarǵa tapsırıldı.

Filial Baspasóz xızmeti.