Usı jıldıń 11-aprel kúni Ózbekstan mámleketlik dene tárbiyacs hám sport universitetinde “Dene tárbiya hám sportta joqarı nátiyjelerge erisiwde ilim hám innovaciyanıń ornı” atamasında ilimiy-ámeliy konferenciya ótkerildi. Konferenciyaǵa Ózbekstan mámleketlik dene tárbiyası hám sport universiteti Nókis filialı direktorı B.Erimbetov ta qatnastı.

Konferenciyanı universitet rektorı Rashid Matkarimov kiris sóz ashıp berdi hám óz sózinde shólkemlestirilip atırǵan bunday ilimiy konferenciya dene tárbiya hám sport tarawında maman kadrlar tayarlaw hám olardıń pedagogikalıq hám ilimiy potencialın jáne de arttırıw hám ilimiy-izertlew jumıslarınıń sapasın túp-tiykarınan jaqsılawda áhmiyeti joqarı ekenligin ayrıqsha atap ótti.

Bunnan soń konferenciya qatnasıwshıları tárepinen temaǵa baylanıslı bir qatar qızıqlı hám tarawdaǵı áhmiyetli máselelerdi qamtıp alǵan prezentaciyalar ótkerildi. Itibarlısı, hár bir prezentaciya qızǵın dodalawlarǵa bay túrde ótip, alıp barılǵan ilimiy izertlewlerdi jáne de jaqsılaw boyınsha zárúr usınıslar berildi.

Konferenciya juwmaǵında eń jaqsı prezentaciya iyelerine sertifikat hám estelik sawǵaları tapsırıldı.

Filial Baspasóz xızmeti.