Búgin Ózbekstan mámleketlik dene tárbiyası hám sport universiteti Nókis filialında «Úsh áwlad» ushırasıwı bolıp ótti.

Ushırasıwdı filial direktorı, professor B.Erimbetov kiris sóz benen ashıp berdi hám miymanlardı studentler-jaslarǵa tanıstırıp ótti.

Ilajda kurash sport túri boyınsha joqarı nátiyjelerge erisken Serik Júsipbekov, kurash sport túri boyınsha 13 márte Ózbekstan chempionı bolǵan Jalǵas Tájimuratov, sporttıń erkin gúres hám sambo túri boyınsha Ózbekstan chempionı Maqset Qutlımuratov hám jaqında Saudiya Arabstanında 17 jasqa shekemgi futbolshılar arasında bolıp ótken Aziya chempionatında chempion bolǵan sportshı Nurbek Sarsenbaevlar student-jaslar menen pikirlesti.

Olar studentlerge sporttıń ózine tán qıyınshılıqları, jeńiske erisiw ushın islenetuǵın shınıǵıwlar, elimizde sporttı rawajlandırıw baǵdarında islengen hám islenip atırǵan jumıslar, jarısta qarsılasınıń ústinen jeńiske erisiw zawqı, ustaz bolıw baxtı, shákirt tayarlaw tártibi hám shákirtleriniń jeńiske eriskendegi quwanıshları haqqında sáwbetlesti. Sonday-aq, hár bir studentti tereń bilim alıwǵa, sport penen turaqlı shuǵıllanıwǵa, jaratılǵan múmkinshiliklerden únemli paydalanıwǵa hám keleshekte elimizdiń rawajlanıwına úles qosatuǵınday jaslar bolıp jetilisiwlerine tilekleslik bildirdi.

Student-jaslar sportqa, sporttıń rawajlanıwına hám elimiz bayraǵın xalıqaralıq sport arenalarında bálentlerden jelbirewine salmaqlı úles qosqan, veteran, shákirtler tayarlap atırǵan hám ózi jas bolıwına qaramastan bir qatar jetiskenliklerge erisken sportshılardan ózlerin qızıqtırǵan sorawlarına juwaplar aldı.

 Filial Baspasóz xızmeti.