Ózbekstan mámleketlik dene tárbiyası hám sport universiteti Nókis filialı tárepinen Ózbekstan Respublikası Ǵárezsizliginiń 34 jıllıǵı múnásibeti menen Respublikamızdaǵı ulıwma bilim beriw mektepleri dene tárbiyası oqıtıwshıları hám mektep oqıwshıları arasında «Áhmiyetli 90 kún» joybarı sheńberinde 22-23-avgust kúnleri sporttıń stol tennis, voleybol hám kóp gúres túrinen ótkeriliwi rejelestirilgen sport jarıslarınıń ashılıw máresimi bolıp ótti.

Usı jıldıń 15-may kúni Ózbekstan Respublikası Prezidenti basshılıǵında «Mektep bilimlendiriwi sistemasındaǵı reformalardıń nátiyjeliligin asırıw boyınsha» ótkerilgen videoselektor májilisinde jaslardıń bos  waqıtların mazmunlı ótkeriwge qaratılǵan «Áhmiyetli 90 kún» baǵdarlaması hám 2020-jıldaǵı 30-oktyabr kúngi «Salamat turmıs tárizin keń en jaydırıw hám ǵalabalıq sporttı jánede rawajlandırıw ilajları haqqında»ǵı PP-6099-sanlı Pármanınıń orınlanıwın támiyinlew maqsetinde Ózbekstan mámleketlik dene tárbiyası hám sport universiteti Nókis filialı tárepinen Qaraqalpaqstan Respublikası Sport ministrligi hám Qaraqalpaqstan Respublikası Mektepke shekemgi hám mektep bilimlendiriw ministrligi menen birgelikte shólkemlestirilip atırǵan jarıstıń saltanatlı ashılıw máresimi Ózbekstan hám Qaraqalpaqstan Respublikalarınıń mámleketlik giminleri menen baslandı.

Ilajdı Qaraqalpaqstan Respublikası Sport ministri Erkinbay Qutıbaev kiris sóz benen ashıp berdi hám bárshe jarıs qatnasıwshılarına tabıslar tiledi. Soń bir qatar taraw basshıları, professor-oqıtıwshılar hám ustaz, trenerler jarıstıń áhmiyetine toqtalıp qatnasıwshı komanda aǵzalarına áwmetler tiledi.

Jarıs Qaraqalpaqstan Respublikasınıń bárshe qala hám rayonlarınan kelgen dene tárbiyası oqıtıwshıları hám mektep oqıwshılarınan dúzilgen komandaları arasında bolıp ótpekte.

Ekinshi kúni jarıs qatnasıwshıların Xojeli rayonı aymaǵında jaylasqan Mizdaxqan arxeologiyalıq kompleksine sayaxat shólkemlestiriledi, yarım final hám final basqıshları bolıp ótedi. Soń jeńimpaz komanda aǵzaların sıylıqlaw máresimi hám koncert baǵdarlamasın ótkeriw rejelestirilgen.

Filial Baspasóz xızmeti.