Qaraqalpaqstan Respublikası Ádillik ministrligi, Prokuraturası hám Ishki isler ministrligi qánigeleri qatnasında Ózbekstan mámleketlik dene tárbiyası hám sport universiteti Nókis filialında korrupciyaǵa qarsı gúresiw hám ashıqlıqtı támiynlew boyınsha filial professor-oqıtıwshıları hám studentleri menen ushırasıw boldı.

Ilajdı filial direktorı B.Erimbetov kiris sóz benen ashıp berdi hám filialda korrupciyalıq jaǵdaylardıń aldın baǵdarında islenip atırǵan jumıslar haqqında toqtap ótti.

Soń Qaraqalpaqstan Respublikası Ádillik ministrligi wákili M.Xojaqmetova, Qaraqalpaqstan Respublikası Prokurorı járdemshisi A.Djumamuratov, Qaraqalpaqstan Respublikası Ishki isler ministrligi Jınayat qıdırıw basqarması aǵa operativ wákili R.Qállibekov, operativ wákil R.Erbaev hám Ózbekstan mámleketlik dene tárbiyası hám sport universiteti Nókis filialı direktorınıń Jaslar máseleleri hám ruwxıy-aǵartıwshılıq isleri boyınsha birinshi orınbasarı G.Xojametovlar sózge shıqtı hám olar búgingi kúnde jámiyettiń rawajlanıwında tosıq bolatuǵın korrupciya illetin túp tamırı menen joq etiw baǵdarında elimizde ámelge asırılıp atırǵan is-ilajlar haqqında ilaj qatnasıwshılarına maǵlıwmatlar berdi.

Sonıń menen birge filial professor-oqıtıwshılarına hám studentlerge korrupciyalıq jaǵdaylardıń guwası bolǵanda qay jerlerge múrájat etiw kerekligi, isenim nomerleri hám maǵlıwmat bergen adamnıń shaxsı sır saqlanıwına kepillenetuǵınlıǵı boyınsha túsinikler berip ótti.

Qatnasıwshılar bul baǵdarda ózlerin qızıqtırǵan sorawlarına tiyisli taraw qánigelerinen juwaplar aldı.

Filial baspasóz xızmeti.