Ózbekstan Respublikası Mámleketlik bayraǵı qabıl etilgenliginiń 34 jıllıǵı múnásibeti menen Ózbekstan mámleketlik dene tárbiyası hám sport universiteti Nókis filialında «Bir el, bir Watan, bir bayraq» súreni astında ruwxıy-aǵartıwshılıq ilajı shólkemlestirildi.

Ilajdı Ózbekstan mámleketlik dene tárbiyası hám sport universiteti Nókis filialı direktorı, professor Bayrambay Erimbetov kiris benen ashıp berdi hám jıynalǵanlardı qutlı sáne – Mámleketlik bayraq qabıl etilgen kún menen qutlıqladı. Ol óziniń shıǵıp sóylegen sózinde bayraǵımızdıń milliy maqtanısh hám ǵárezsizlik tımsalı sıpatında tutqan ornına, onıń hár bir watanlasımızdıń qálbindegi áhmiyetine toqtap ótti.

Májiliste Berdaq atındaǵı Qaraqalpaq mámleketlik universiteti yuridika fakultetiniń «Insan huqıqları» kafedrası professor-oqıtıwshısı Sultan Zayitov, «Arxeologiya» kafedrası docenti Nargiza Seytimbetova hám Arqa-Batıs áskeriy okruginen letenant Rashit Omadovlar mámleketlik bayraqtıń jaratılıw tariyxı, ondaǵı belgiler, reńlerdiń mánisi haqqında túsinikler berip ótti.

Atap ótiliwinshe, Mámleketlik bayraǵımız xalqımızdıń ásirlik arzıw-niyetleri, miynet súygishligi, miymandoslıǵı hám iygilikli maqsetlerin ózinde jámlegen muqaddes tımsal bolıp esaplanadı. Búgingi kúnde ol elimizdegi barlıq mámleketlik uyımlar, bilimlendiriw mákemeleri, xalıqaralıq shólkemler hám sport jarıslarında maqtanısh penen jelbirep, elimizdiń abırayın, xalqımızdıń maqtanıshın bildirip kelmekte.

Ilaj filial studentleri tárepinen tayarlanǵan koncert baǵdarlaması menen dawam etti.

Filial Baspasóz xızmeti.