Búgin Tashkent qalasında Ózbekstan Respublikası Prezidenti Administraciyasınıń 2025-jıl 02-PA 1/1-3868-sanlı tapsırmasına muwapıq elimizdiń joqarı bilimlendiriw sistemasınıń rawajlanıwına tikkeley tásir kórsetetuǵın iri xalıqaralıq ilaj – “QS Evroaziya forumı 2025” ótkerilmekte.

Forum – Ózbekstan joqarı oqıw orınlarınıń xalıqaralıq reytinglerdegi ornın jáne de bekkemlew, reyting shólkemleri menen birge islesiwdi jańa basqıshqa alıp shıǵıw, joqarı bilimlendiriw sistemasındaǵı reformalardı keńnen sáwlelendiriw, tarawǵa sırt el investiciyaların tartıw hám bilimlendiriw xızmetleriniń eksportın arttırıw názerde tutılǵan.

Bul forum Oraylıq Aziya universiteti (Central Asian University) hám dúnyaǵa belgili “QS” xalıqaralıq reyting agentligi menen birgelikte shólkemlestirilgen bolıp, onda region hám dúnyanıń abıraylı joqarı bilimlendiriw mákemeleriniń wákilleri, xalıqaralıq ekspertler, ilimiy-izertlew oraylarınıń qánigeleri hám bilimlendiriw tarawı boyınsha jetekshi juwapkerler qatnaspaqta.

Forumda Ózbekstan mámleketlik dene tárbiyası hám sport universiteti Nókis filialı direktorı, professor B.Erimbetovta qatnaspaqta. Forumda filial direktorı sırt el bilimlendiriw mákemeleri, ilimiy-izertlew orayları hám reyting agentlikleri menen tájiriybe almasıw, filialdıń global maydandaǵı ornın bekkemlew hám xalıqaralıq joybarlarda qatnasıw kólemin keńeytiw máselelerinde jedel sóylesiwler alıp barmaqta.

Ilaj sheńberinde Ózbekstan hám bir qatar sırt el joqarı bilimlendiriw shólkemleri arasında eki tárepleme birge islesiw shártnamalarına qol qoyıw, qospa bilimlendiriw baǵdarlamaların jolǵa qoyıw, xalıqaralıq ilimiy joybarlar hám akademiyalıq almasıw baǵdarlamaların keńeytiw boyınsha kelisimlerge erisiw rejelestirilgen. Bul kelisimler respublikamız joqarı bilimlendiriw mákemeleriniń ilimiy potencialın arttırıw, kadrlar tayarlaw sistemasın jetilistiriw hám dúnya kólemindegi integraciyanı kúsheytiwde úlken áhmiyetke iye.

Filial Baspasóz xızmeti.