Ózbekstan mámleketlik dene tárbiyası hám sport universiteti Nókis filialında «Ózbekstan – ulıwma úyimiz» atamasında dógerek sáwbet bolıp ótti.

Festivaldı Jaslar máseleleri hám ruwxıy-aǵartıwshılıq isleri boyınsha direktordıń birinshi orınbasarı kiris sóz benen ashıp berdi hám kelgen miymanlardı qatnasıwshılarǵa tanıstırdı.

Soń Qaraqalpaqstan Respublikası Din isleri boyınsha komiteti bas qánigesi Qudaybergen Nizamatov, Nókis qalası Bas imam xatibi Aminjan Nabatov, Respublikalıq úgit-násiyat toparı aǵzası, Ózbekstanda xızmet kórsetken jaslar ustazı Begdulla Sultanov hám Respublikalıq ruwxıy-aǵartıwshılıq orayı Nókis qalalıq bólim baslıǵı Qıdırbay Nuratdinovlar sózge shıǵıp elimizde milletleraralıq tatıwlıq, doslıqtı bekkemlew baǵdarında nátiyjeli isler jolǵa qoyılıp, milliy mádeniy oraylar menen islesiwdi bunnan bılay da rawajlandırıwǵa baǵdarlanǵan kólemli jumıslar ámelge asırılıp atırǵanlıǵın, Ǵárezsizliktiń dáslepki jıllarınan baslap, mámleketimizde  diniy keńpeyillik  mádeniyatın rawajlandırıw, milletleraralıq awızbirshilik hám tatıwlıqtı bekkemlew, barlıq puqaralarǵa milleti, dini jáne de sociallıq kelip shıǵıwına qaramastan teń huqıq hám múmkinshilikler jaratıw mámleket siyasatınıń ayrıqsha baǵdarlarınan biri ekenligin ayrıqsha atap ótildi hám olardıń huqıqları menen erkinliklerin qorǵaw, bilim alıwı, óziniń uqıbı hám qızıǵıwshılıǵı tiykarında kásip-óner iyelewi, mádeniyatı, úrp-ádet hám salt-dástúrlerin saqlaw hám rawajlandırıwı ushın zárúr imkaniyatlar jaratılıp berilgenligi ayırıqsha atap ótildi.

Sáwbet barısında studentler bul baǵdarda ózlerin qızıqtırǵan sorawlarına juwaplar aldı.

Filial Baspasóz xızmeti.