Ózbekstan mámleketlik dene tárbiyası hám sport universiteti Nókis filialında “Dene tárbiyası hám sport boyınsha qánigelerdi tayarlawdıń áhmiyetli mashqala hám sheshimleri” atamasında respublikalıq ilimiy-ámeliy konferenciya bolıp ótti.

Konferenciyaǵa elimizdegi joqarı oqıw orınlarınıń ilimpazları, jas izleniwshileri, magistrantlar hám studentleri qatnastı.

Konferenciyanıń ashılıw máresiminde Ózbekstan mámleketlik dene tárbiyası hám sport universiteti Nókis filialı direktorınıń Ilimiy isler hám innovaciyalar boyınsha orınbasarı, p.i.d. (DSc), professor Mambetnazarov Islambek Muratbaevich shıǵıp sóylep, sońǵı jılları pútkil dúnya júzinde bolǵanı sıyaqlı elimizde Prezidentimizdiń basshılıǵında dene tárbiyası hám sport tarawın rawajlandırıwǵa ayrıqsha itibar qaratılıp atırǵanın hám usınday qollap-quwatlawlardıń nátiyjesinde mámleketimiz sportshıları tárepinen xalıqaralıq sport arenalarda úlken tabıslar qolǵa kirgizilip atırǵanın aytıp ótti hám tarawdı ele de rawajlandırıw ushın ilim menen tıǵız birge islesiw zárúrligine de toqtap, konferenciyanıń aldaǵı jumıslarına tabıslar tiledi.

Bunnan soń konferenciya óz jumısın basladı. Konferenciyada filialdıń “Jeke gúres sport túrleri teoriyası hám metodikası” kafedrası docenti, p.i.b.f.d. (PhD) Uluǵbek Jarılkapov «Erkin gúresshilerdiń texnikalıq tayarlıqların jetilistiriw metodikası», “Kordinatciyon hám ciklik sport túrleri teoriyası hám metodikası” kafedrası docenti Jánigúl Berdimuratova «Oqıw-shınıǵıw basqıshında shuǵıllanıwshı awır atletikashı sportshı qızlardıń shınıǵıw júklemelerin islep shıǵıwda onıń metodikalıq usılları hám jarıs iskerligine tásiri», usı kafedranıń docenti Íqlas Utemuratov «Milliy oyınlar hám xalıq úrip-ádetler arqalı dene tárbiyası sabaqlarında salamat turmıs tárizi kónlikpelerin rawajlandırıw», “Dene tárbiya teoriyası, gumanitar hám tábiyiy pánler” kafedrası docent, ps.i.b.f.d. (PhD) Ulbosın Kalillaeva «Joqarı sport nátiyjelerine erisiwde psixologiyalıq tayarlıqtıń roli» atamasında hám basqada bir qatar joqarı oqıw orınları qatnasıwshıları búgingi kúnniń áhmiyetli máseleleri boyınsha bayanatlar jasadı. Bul boyınsha ilimpazlar hám qánigeler ózleriniń pikirlerin bildirdi.

Konferenciya sońında bayanatshı hám qatnasıwshılar tárepinen bildirilgen pikir hám usınıslardı inabatqa alǵan halda sport oyınlarınıń túrlerin ǵalabalıq rawajlandırıw is-ilájları belgilep alındı.

Belsene qatnasqan izleniwshiler hám student-jaslar filial administraciyası tárepinen sertifikat penen sıylıqlandı.

Filial Baspasóz xızmeti.