Búgin Ózbekstan mámleketlik dene tárbiyası hám sport universiteti Nókis filialında jaslardıń ruwxıy dúnyaqarasın bayıtıw, milliy qádiriyatlarǵa húrmet ruwxında tárbiyalaw, diniy keńpeyillik hám hújdan erkinligi principlerin keńnen úgit-násiyatlaw maqsetinde “Milliy qádiriyatlar hám olardıń millet ruwxıylıǵındaǵı ornı” atamasında ruwxıy-aǵartıwshılıq ushırasıwı shólkemlestirildi.

Ilajda Ózbekstan Respublikası Din isleri boyınsha komiteti Qaraqalpaqstan Respublikası aymaqlıq basqarmasınıń bas qánigeleri X.Nezamatov hám X.Ibragimova, Nókis Muhammed ibn Ahmad al-Beruniy atındaǵı orta arnawlı islam bilim jurtı direktorınıń orınbasarı Q.Mambetov, Qaraqalpaqstan Respublikası Ishki isler ministrligi xizmetkeri S.Tańabergenov, filial  tyutorları hám student-jaslar qatnastı.

Ushırasıw dawamında sózge shıqqanlar milliy qádiriyatlar — xalqımızdıń bay ruwxıy miyrası, úrp-ádetleri, dástúrleri, tili hám mádeniyatın qásterlep saqlaw jáne olardı keleshek áwladqa jetkeriwdiń áhmiyetli faktorı ekeni atap ótildi. Sonday-aq, milliy qádiriyatlar hám ulıwmainsanıylıq principlerdi úylestiriw, jaslarda Watanǵa muhabbat, úlkenlerge húrmet, kishige izzet hám óz-ara keńpeyillik pazıyletlerin qáliplestiriw máselelerine ayrıqsha itibar qaratıldı.

Sonday-aq, túrli millet hám din wákilleri arasında óz-ara húrmet, awızbirshilik hám tatıwlıqtı bekkemlew, basqa insanlardıń isenim hám kózqaraslarına húrmet penen qatnasta boliwdıń áhmiyeti túsindirildi. Jámiyette tınıshlıq hám turaqlılıqtı támiyinlewde keńpeyillik, óz-ara isenim hám birge islesiw áhmiyetli orın iyeleytuǵını, atap ótildi.

Ilaj sońında “Tınıshlıqtıń qádiri” temasında videorolik hám jáne sergeklikke shaqıratuǵın slaydlar qoyıp berildi.

Filial baspasóz xızmeti.