Búgin Ózbek tiline mámleketlik til biyligi berilgenine 37 jıl toldı. Usı múnásibet penen Ózbekstan mámleketlik dene tárbiyası hám sport universiteti Nókis filialında «Qádiriń bálent bolsın, ana tilim» atamasında ádebiy keshe bolıp ótti.

Bayram keshesin Ózbekstan mámleketlik dene tárbiyası hám sport universiteti jaslar máseleleri hám ruwxıy-aǵartıwshılıq isleri boyınsha prorektorı Sh.Mirzanov kiris sóz benen ashıp berdi hám jıynalǵanlardı bayram menen qutlıqlap, ózbek tiliniń áhmiyetine toqtap ótti.

Ilajda sóz alǵanlar ózbek tiliniń tartımlılıǵın, onıń dúnya júzi xalıqları arasında tutqan ornı hám keleshek áwladtı ana tiline húrmet ruwxında tárbiyalaw, tildiń statusın hám abırayın kóteriw baǵdarında islengen jumıslar haqqında bayanatlar jasadı.

Onnan soń «Doslıq ushırasıwı» sheńberinde ótkerilgen intellektual oyınları, sport jarısları hám mádeniy ilajlarda belsene qatnasqan joqarı oqıw orınlarınıń professor-oqıtıwshıları, komanda aǵzaları hám studentlerine Ózbekstan mámleketlik dene tárbiyası hám sport universiteti Nókis filialı direktorı atınan Diplom, Minnetdarshılıq xatı hám estelik sawǵaları tapsırıldı. 

Bayram keshesi filial studentleri tárepinen tayarlanǵan koncert baǵdarlaması menen dawam etti.

Filial Baspasóz xızmeti.