Ózbekstan mámleketlik dene tarbiyası hám sport universiteti Nókis filialında jańa redakciyadaǵı “Bilimlendiriw haqqında”ǵı Ózbekstan Respublikası nızamın keńnen úyreniw, jámáát arasında dodalaw, mazmun-mánisin túsindiriw maqsetinde onlayn májilis bolıp ótti. Oǵan professor-oqıtıwshılar hám filial xızmetkerleri qatnastı. Májilisti Ilimiy isler hám innovaciyalar boyınsha direktor orınbasarı M.Aytımbetov kiris sóz benen ashtı hám basqarıp bardı. Ol óz sózinde Ózbekstan Respublikasınıń “Bilimlendiriw haqqın”ǵı Nızamı 2020-jıl 23-sentyabr kúni qabıl etilgenligin, bul nızamnıń 1997-jılı qabıl etilgen nızamnan ózgesheligin, búgingi kúndegi áhmiyeti haqqında keń túrde aytıp ótti. Bunnan soń sózge shıqqan Bilimlendiriw sapasın qadaǵalaw bólimi baslıǵı M.Razamanov jańa redakciyadaǵı bul nızamnıń bilimlendiriw sapasın elede jetilistiriwge unamlı tásir kórsetiwin atap ótti. Sonday-aq, bilimlendiriw shólkemlerin attestaciyadan hám mámleket akkredaciyasınan ótkeriliwin, bilimlendiriw shólkemlkerinde tálim-tárbiya procesiniń monitoringın ámelge asırıw, mámleketlik emes shólkemlerinde licenziya beriliwi boyınsha arnawlı statyalardıń kiritilgenligin atap ótti.

Májiliste professor oqıtıwshılardan A.Elmuratova, B.Allambergenova, Q.Keńesbaev, B.Sobirov hám basqalar sózge shıǵıp, elimizde bilimlendiriwdi jańa basqıshqa alıp shıǵıwda, jas áwladlarǵa tálim-tárbiya procesin úzliksiz alıp barıwda bul nızam bekkem huquqıy tiykar bolatuǵının atap ótti.

S.Abdikamalov,

Ziyrek studentlerdiń ilimiy-izertlew iskerligin

shólkemlestiriw bólimi ilimiy-injeneri