Ulıwma orta bilim beriw mektep oqıwshıları hám joqarı oqıw orınları student jasları arasında sporttıń erkin gúres túrin rawajlandırıw, mektep oqıwshıları arasınan jas talantlı sportshılardı tańlap alıw, Respublikalıq saylandı komandasın muwapıqlastırıw, trener hám tóreshilerdiń tájriybesin asırıw, Qaraqalpaqstan Respublikası saylandı komandasın shólkemlestiriwde kúshli sportshılardı saylap alıw maqsetinde Qaraqalpaqstan Respublikası Turizm hám sport bas basqarması baslaması menen Respublikalıq jeke gúres túrleri boyınsha qánigelestirilgen balalar hám jas óspirimler sport mektebi hám Qaraqalpaqstan Respublikası sport gúresleri federaciyası menen birgelikte 2002-2004-jılları tuwılǵan jaslar arasında sporttıń erkin gúres túri boyınsha Qaraqalpaqstan Respublikasınıń chempionatı Respublikalıq jeke gúres túrleri boyınsha qánigelestirilgen balalar hám jas óspirimler sport mektebinde bolıp ótti.

Bolıp ótken chempionatqa Ózbekstan mámleketlik dene tárbiyası hám sport universiteti Nókis filialı studentleride qatnasıp sıylı orınlardı iyeledi.

         – Belgilengen salmaq kategoriyaları boyınsha shólkemlestirilgen chempionat sportshılarımızdıń óz ústinde ele de kóbirek islewine hám izleniwine túrtki boladı. Sebebi, bir-biriniń texnikaların úyrenedi. Eger orın alsa, sportqa bolǵan qızıǵıwshılıǵın arttıradı. Al, kerisinshe qarsılasınan jeńilse, óz ústinde ele de kóp shınıǵıwlar alıp barıwına túrtki boladı dep oylayman. Ótkerilgen bul chempionatta filialımızdan qatnasqan Aǵabek Jumamuratov, Dinmuxammet Urazxanov, Rasul Meńlimuratov, Sherzad Allambergenovlar 1-orındı iyelegen bolsa, Rusdan Orınbaev, Asadbek Artikov hám Aybek Nietbaevlar  2-orındı iyeledi, al, Ilham Tolıbaev, Mirbek Qolbergenovlar 3-orınlardı jeńip alıwǵa eristi. Men oylayman hám oǵan isenimim kámil, filialımızda bilim alıp atırǵan student jaslardan erteńgi kúni tarawda jaqsı kadrlar, yaǵnıy, chempionlar jetilisip shıǵadı dep oylayman, – deydi filial oqıtıwshısı A.Pirimbetov.

         Álbette, bári-bir oqıw ornı sport tarawına jetik qánigelerdi tayarlaytuǵın oqıw dárgayı bolǵannan soń qanday sport jarıslarında qatnasada belgili dárejede filialımız studentleri sıylı orınlardı iyeleytuǵınlıǵı tábiyiy jaǵday.

         Sportshılardı chempionatqa filialımız oqıtıwshıları M.Kazaev hám A.Pirimbetovlar tayarladı.

Filial Baspasóz xızmeti.