Ulıwma orta bilim beriw mektep oqıwshıları hám joqarı oqıw orınlarınıń student jasları arasında sporttıń erkin gúres túrin rawajlandırıw, mektep oqıwshıları arasınan jas talantlı sportshılardı tańlap alıw, trener hám tóreshilerdiń tájriybesin  asırıw, Qaraqalpaqstan Respublikası saylandı komandasın shólkemlestiriw hám kúshli sportshılardı anıqlaw maqsetindi Qaraqalpaqstan Respublikası Turizm hám sport bas basqarmasınıń baslaması menen Respublikalıq jeke gúres túrleri boyınsha qánigelestirilgen balalar hám jas óspirimler sport mektebi hám Qaraqalpaqstan Respublikası sport gúresleri boyınsha federaciyası menen birgelikte usı jıldıń 9-10-noyabr kúnleri sporttıń erkin gúres túrlerinen eresekler arasında Qaraqalpaqstan Respublikası chempionatı bolıp ótti.

         Ótkerilgen chempionatqa Ózbekstan mámleketlik dene tárbiyası hám sport universiteti Nókis filialınıń professor – oqıtıwshıları M.Kazaev hám A.Primbetovlardıń tayarlap atırǵan filialımızda bilim alıp atırǵan shákirtleride qatnasıp, olardan A.Saparniyazov, I.Qıdırbaevlar 1-orınlardı, A.Xojanazarov, T.Urazxanov, B.Alaudinov, R.Urınbaev, B.Seytmuratovlar 2-orınlardı iyelegen bolsa, A.Qırıkbaev, A.Uzaqbergenov, B.Xalmuratovlar 3-orınlardı jeńip alıwǵa miyasar boldı.

         Respublikamız kóleminde ótkerilip atırǵan jarıslarda M.Kazaev hám A.Primbetovlardıń tayarlap atırǵan shákirtleri filialımızǵa jaqsı jetiskenliklerdi alıp kelmekte.

Álbette, bul filialımızdaǵı professor-oqıtıwshılardıń sportqa mehir qoyǵan student jaslar menen tınımsız shınıǵıwlar alıp barıwlarınıń nátiyjesi dep bilemiz. Olardıń aldaǵı jumıslarında tasqın-tabıslar tileymiz. Tayarlap atırǵan shákirtleri xalıqaralıq sport jarıslarında sıylı orınlardı iyelep elimizdiń bayraǵın bálentlerge kóteredi dep isenemiz.

Filial Baspasóz xızmeti.